Lo cineasta israelian Guy Davidi ven de presentar son darrièr film documentari, Innocence, al Festenal de Cinèma Josieu de Barcelona. Aquela òbra, seleccionada al Festenal de Venècia, expausa un subjècte prigondament dolorós: los suicidis dins l’armada israeliana. Lo filme se basa sus sèt cent cases de joves soldats que se suicidèron dempuèi los ans 1970, en presentant cinc istòrias coma ais central. Per mejan de letras, de jornals, de fòtos de familha e de filmatges dins l'armada, Davidi mòstra la pression sociala que buta los joves israelians a s'enrotlar. D’efièch, lo servici militar israelian es obligatòri e, segon la lei, es de tres ans pels gojats e de dos ans per las gojatas. A l’ocasion de son sojorn a Barcelona, nòstres confraires de Vilaweb li an fach una entrevista a prepaus del filme.

Lo documentari non solament expausa aqueles suicidis, mas apregondís las rasons per las qualas totplen de joves umanistas, pacifistas o amb una consciéncia politica fòrta se tròban embarrats dins una situacion que se’n pòdon pas escapar. Davidi explica cossí qualques soldats se suicidèron coma un biais extrèm de refusar de contunhar lo servici militar, incapables d'afrontar l'òdi e l'isolament que los produtz la desobesissença.

Innocence es un filme que fa bolir lo debat sul ròtle de l’armada dins la societat israeliana e son influéncia sus la joventut. Davidi, que tanben refusèt de far lo servici per de rasons psicologicas, explica que lo filme cèrca de dobrir una reflexion demest los sectors de l'esquèrra d'Israèl, que malgrat que defendan la democracia e los dreches umans, contunhan de veire l'armada coma un element unificador.

Davidi es, a l’ora d’ara, installat en Danemarc. El es conegut per son trabalh precedent e nomenat a l'Oscar Five Broken Cameras, e contunha de preconizar una solucion pacifica al conflicte israelopalestinian.