Ongan, lo festenal Festen’Òc se clavarà los 9 e 10 de novembre amb doas seradas excepcionalas la Maison d’Amont,  a Saurat (Savartés). Lo programa prepausa de balètis, de concèrts gratuits, d’obradors de dança e tanben de repaisses sus plaça. Se destaca la participacion de Tarabastar, Moizbat, Clica Dròna e Lhi Balòs, entre tantes artistas.

D’albergament es ofèrt a proximitat, particularament pels campaires, e d’autras solucions son disponiblas suls sits de la comuna de Saurat e de l’ofici de torisme dels Pirenèus Ariegeses.

Festen’Òc ven de mai en mai lo festenal occitan de referéncia, ont se viu una occitanitat festiva naturala dins un pichon vilatge e de jovenòts parlan la lenga e la parlan bèlament. Es un eveniment transversal ont se mesclan de militants occitans, d’alternatius, de festejaires, d’amoroses de danças, d’amoroses de convivéncia, de joves e mens joves que se bandan e furgan, d’afogats de las discussions politicas e del rire.

Mai d’entresenhas sus la pagina Facebook de Festen’Òc.