Lo parlament italian aprovèt dimècres la lei mai dura d’Occident contra la maternitat de substitucion internacionala, que de fach empedirà los parelhs omosexuals d’aver d’enfants, çò rapòrta The Washington Post. La lei impausa de penas de preson e de multas pels futurs parents qu’utilizen de maires substitutas a l’estrange. E mai la subrogacion siá ja enebida en Itàlia, aquela nòva legislacion classifica la practica coma un crime universal, comparable als crimes de terrorisme o de genocidi, e tòca subretot los parelhs omosexuals.

La primièra ministra Giorgia Meloni a butada la lei dins l’encastre de son projècte politic ultraconservator per afortir las valors familialas tradicionalas. Las nòvas regulacions penalizan tanben los professionals de la santat italians que trabalhen dins de clinicas estrangièras que faculten la subrogacion, tanben apelada GPA (gestacion per altrú) segon lo drech francés.

Amb aquela regulacion, Meloni consolida sa posicion de defensora de la familha tradicionala, en empachant las unions del meteis sèxe d’inscriure lors enfants e en limitant los dreches d’autres grops, coma los menors transgenres. Aquela mesura a generat un debat intens, que qualques expèrts creson que poiriá menar a una interdiccion internacionala de la subrogacion.

Mesa en òbra complicada

Ça que la, los expèrts soslinhan que la mesa en òbra de la lei serà complicada, mai que mai pels parelhs eterosexuals, que poirián inscriure lor mainat sens problèmas. D’autre caire, las unions omosexualas seràn mai afectadas, pr’amor que serà mai aisit de las identificar. Alessia Crocini, presidenta de l’associacion Famiglie Arcobaleno (Familhas Arcolan), critica que la tòca vertadièra de la lei es de rendre mai dificil als parents omosexuals de començar una familha. Aital Crocini fa una crida als cònsols màgers de tot l’estat italian per que desobesiscan a aquela lei, e la peticion ja amassa aperaquí 70 000 signaturas.