L’Arabia Saudita e Kowait voldrián far desaparéisser los Fraires Musulmans en Egipte”, e per aquò l’Arabia Saudita manda e mandarà d’argent a l’armada egipciana, çò afirmava Farah Halime dissabte passat al jornal catalan Ara. Farah Halime es economista e cercaira de l’European Council of Foreign Relations; es epecializada en l’analisi de las economias pòstrevolucionàrias.

Dins aquela entrevista, l’economista fasiá una analisi de la situacion economica d’Egipte: “es desastrosa, tot es arrestat. La borsa es barrada, lo mond van pas al trabalh pr’amor del cobrifuòc e las grandas entrepresas se’n van”.
 
“L’armada a un empèri economic: contraròtla 10% de l’economia. A tant d’usinas de macarrònis coma de refregidors. Vòlon pas pèrdre lo poder, vesián que l’economia s’enfonzava amb Mursi e an recuperat lo poder”.
 
Al delà, las donadas de las ajudas economicas a Egipte mòstran que l’Arabia Saudita, Kowait e los Emirats Arabis Units an mandat fòrça d’argent. Segon Halime los govèrns dels païses del Golf Persic son plan contents de veire la repression dels Fraires Musulmans, e contunharàn de pagar los militars per que los anequeliscan. “Lors interèsses politics dins la region son en jòc”; se pòt verificar en vesent “lo perfil bas de Qatar dins tota aquela crisi, que donèt fòrça argent a Mursi”, çò apond.
 
Tanplan cal comptar las ajudas economicas dels Estats Units, e mai la pression que recebon per quitar d’ajudar l’armada egipciana, “çò qu’es interessant d’un ponch de vista estrategic” pels Estats Units, mas “a l’ora d’ara son a debatre çò que van far”.
 
Se los Estats Units quitavan d’ajudar Egipte, “aquò provocariá una reaccion en cadena dins lo meteis sens venent de l’Union Europèa”, e es per aquò que “l’armada s’arrapa a l’ajuda de l’Arabia Saudita”.
 
L’Union Europèa s’engatgèt a mandar 5 miliards d’èuros en 2013, mas tot aquel argent es blocat dins l’espèra de reformas democraticas.