Lo Partit Occitan a manifestat son sosten a las ràdios associativas fàcia a la possibla reduccion del budget pels mèdias, una mesura que tocariá particularament aquelas estacions e gaireben totas las ràdios en occitan. Segon lo PÒC, lo Fons de Sosten a l’Expression Ràdiofonica (FSER) poiriá patir una diminucion del 35%, l’equivalent de 10 milions d’èuros.

A l’ora d’ara, l’FSER es una font essenciala de finançament per mai de 700 ràdios associativas de tot l’estat francés, que jògan un ròtle clau dins la diversitat culturala e d’opinion dins los territòris. La reduccion d’aquel fons menaçariá la viabilitat d’aquelas ràdios e fariá pèrdre un nombre significatiu d’emplecs dins lo sector.

Las ràdios associativas, segon lo Partit Occitan, son fondamentalas per la pluralitat d’opinions e, en fòrça escasenças, constituisson lo sol espaci d’expression per las lengas minorizadas coma l’occitan. Lo partit avertís qu’aquela fòrta diminucion poiriá aver una repercussion negativa sus la promocion de la lenga, compte tengut del fach los mèdias publics contunhan de limitar l’espaci consagrat a l’occitan. En mai d’aquò, soslinhan que la desaparicion d’aquelas ràdios beneficiariá sonque als grands grops mediatics, exacerbant la concentracion del sector e metent en perilh la libertat d’expression.