De cercaires franceses an demostrat, pel primièr còp de l’istòria de la medecina modèrna, que lo càncer pòt espelir sens cap de mudacion de l’ADN. La descobèrta fa dobtar ara de l’influéncia de l’environament sus la nòstra santat e sus l’aparicion de malautiás coma lo càncer.

La medecina modèrna a descobèrt, aquestes darrièrs 50 ans, fòrça mudacions geneticas. Que fins ara èran la causa dirècta de cèrts càncers. Las malautiás coma lo càncer s’avian, mai que mai, pr’amor d’una modificacion genetica de l’ADN que comença de crear de cellulas que formaràn las tumors e pòt pas res far per las arrestar.

Totun, tanben i a cèrts factors environamentals coma lo tabac, lo Solelh o encara l’alimentacion que tanben pòdon contribuir a l’espelida del càncer. E ara los cercaires an descobèrt qu’i pòt aver de cambiaments non genetics que sián pas de mudacions e que tanben pòscan causar aquel tipe de malautiás.

 “Avèm trapat que i a cèrts cambiaments, dont los epigenetics, coma de cambiaments quimics al nivèl de las proteïnas que son plan raras. Mas que pòdon interagir sus l’ADN a l’ora de definir s’una lectura genetica es bona o pas, çò diguèt Giacomo Cavalli, cap de la còla de cercaires del CNRS, e pòdon tanben finir en un marrit luòc “.

Fins ara se cresiá que los cambiaments epigenetics arribavan après una mudacion de l’ADN. Mas amb aquela descobèrta se pòt assolidar que, sens cap de cambiament al nivèl genetic, lo càncer pòt aparéisser d’un biais parièr.

E doas personas pòdon desvolopar un càncer o non malgrat lo meteis ADN.

Una origina plan desconeguda

Malgrat tot aquò, çò apondèron los cercaires, es plan malaisit de trapar perqué nais aquel tipe de càncer, car la tecnologia actuala es pas pro precisa. “Las tumors son totjorn trobadas a una fasa mai tardièra. E podèm pas trobar la primièra cellula que cambièt e provoquèt la naissença del càncer, çò diguèt Cavallo. E tanpauc es pas possible de trobar las primièras 1000 cellulas que comencèron de desvolopar aquel càncer”.

Segon l'estudi, publicat dins lo numeric Nature, s'es pogut trobar los cambiament epigenetics amb d’oncogèns, que son de gèns facultan fòrça la progression de la tumor. A l'encòp, i a d’autres gèns que luchan contra la tumor e la siá progression. Es lo sol biais qu’ajam per luchar contra la malautiá.

Alara, s’òm torna cambiar los factors genetics, la majoritat dels gèns malauts tornaràn venir sans, mas pas totes. E son aqueles gèns que persistisson a l’ora de provocar la progression del càncer. Aqueles cambiaments epigenetics pòdon arribar pr’amor d’estimuls exteriors. Lo bisfemòl A o d’autres compausats coma lo PFAS, que se tròba dins lo plastic, o l’arsenic pòdon contribuir a desvolopar aqueles cambiaments. (Legissètz la seguida).

Aqueste article es publicat dins Sapiéncia, la revista occitana de divulgacion scientifica, amb la quala Jornalet a un acòrdi de cooperacion. Podètz legir l'article entièr aicí.