Après lo succès de sa primièra edicion, Narbona aculhirà un an de mai lo collòqui Agaches los 28 e 29 de novembre de 2024, aqueste còp amb una plaça importanta per l’Amassada Euroregionala dels Joves.

La tòca de l’eveniment es de mesurar lo progrès e los obstacles dins lo desvolopament de l’euroterritòri de coesion entre Occitània e Catalonha. Aquesta edicion, que festeja los 20 ans de l’Eurocongrès, amassarà al musèu Via Narbo d’expèrts e de participants de la region dicha Occitània, del Principat de Catalonha e de las Illas Balearas.

Lo programa compren una tièra de conferéncias, de taulas redondas e d'activitats culturalas centradas sus de tèmas coma l'istòria comuna, las lengas e las culturas, e lo desvolopament sostenible. La jornada del 29 de novembre metrà en evidéncia la diversitat culturala e istorica dels espacis occitans e catalans, e tanben las iniciativas per promòure las lengas regionalas e la collaboracion entre los joves.

L’associacion Euroccat soslinha l’importància d’aquelas euroregions coma factors de coesion e de solucions als desfises màgers. Dins un contèxt d’integracion europèa, Agaches vòl abordar lo problèma de las frontièras e las possibilitats de las superar, tant entre los estats coma d’un biais intèrne.