L’association Aquí L’Òc organiza dempuèi 4 ans lo concors d’escritura Pèire Braiac en occitan per Occitània tota. Aqueste concors, a gratis e dubèrt a totes, compta 4 categorias: elementaris, collegians, liceans, adultes. Las produccions pòdon èsser individualas o collectivas.

Lo genre càmbia d’una annada a l’autra amb de pròsa, de poesia o de teatre. Aquesta annada escolara 2024-2025, Aquí L’Òc a causit una istòria risolièra, en omenatge a l’autor carcinòl defuntat a la fin d’agost passat, dins la quala los estils dirècte e indirècte se mesclaràn. Los participants utilizaràn la lenga d’òc, quin que siá lo dialècte.

Las espèras d’escritura son las seguentas: los elementaris mandaràn lor istòria dactilografiada entre 10 e 20 linhas A4 rècto; los collegians una pagina A4 rècto; los liceans e los adultes, eles, sus una pagina A4 rècto e vèrso. Per totes, lo tèxte serà anonim sens indica de possibilitat d’identificacion de l’autor(a), amb un títol. La polícia serà Verdana e la talha serà 12 amb una interlinha de 2. La mesa en pagina de l’istòria deurà èsser respectada. Lo tèxte deurà èsser mandat en 3 exemplaris per cada categoria (2 còpias papièr e 1 còpia numerica).

Mas abans cal que cada participant complete un formulari d’inscripcion en botant sas coordenadas e la categoria dins la quala escriu. Per las participacions collectivas, cal precisar: per un establiment escolar la classa, l’atge dels escolans e lo nom del professor, e per una associacion o un grop de personas lo nom del responsable del grop o lo nom de l’associacion. Sus la còpia, cal escriure la categoria.

Las inscripcions son encara possiblas duscas al dijòus 31 d’octòbre comprés. Trobaretz lo formulari e lo reglament interior sul sit internet de l’associacion Aquí L’Òc: www.espacioccitancarcinol.com

L’associacion a tornar pres sas activitats, los corses d’occitan per adultes e per enfants, los talhièrs de cants, las danças tradicionalas e las convèrsas a l’Espaci Occitan Carcinòl, mas tanben l’organizacion de sas animacions: lo rencontre literari se tenguèt lo 12 d’octòbre a la mediatèca de Sent Seren amb Cristian Andrieu, la velhada occitana se debanarà lo 29 de novembre a Prudomat, al restaurant Le canard qui rit, e la dictada occitana a Gramat en partenariat amb la mediatèca lo dissabte 25 de genièr de 2025.

La botiga de l’Espaci Occitan Carcinòl es dubèrta cada dimècres de 9 oras a 12 oras e una bibliotèca i es presenta tanben amb de nombroses libres e revistas. Aquí L’Òc ten d’obradors e a tanben dos projèctes d’edicion: la reedicion de Racontes d’una familha d’Òc de Joèl Simon e l’edicion de contes Lo Blaublu e la Silveta de Fèliç Daval.

Associacion Aquí L’Òc
204, Carrièra del general Ambert
46400  Sent Seren, Occitània
Tel: +33(0)6 73 62 64 63
Corric: asso.aquiloc@gmail.com