Un còp èra una polida debuta de tantossada del 15 d’octòbre dins los environs de la selva dels Banhs de Rènnas. Calandrons, regenta, ajudas e parents caminèrem lo cap en bas e lo cuol en l’aire, e d’en pertot s’ausissiá:

— “Gaita! n’i a de pertot”, “Aquí n’i a doas ensems”, “Son bèlas!”“Ai, que fissa!”

La selva tota èra emplenada de voses gaujosas d’aquestes cercaires del tresaur de la davalada: la castanha.

Un còp que los panièrs foguèron emplenats, que cadun aviá plan profechat de l’odor meravilhosa de la natura, l’ora venguèt de realizar un projècte de Land Art preparat en classa:

la crotz occitana de la natura.

Cadun èra a son pòste: los enfants trigavan, los parents ajudavan e tot lo monde i botiá de se per realizar l’òbra d’art polida!

Enfin, botèrem la toca finala e convidèrem los parents per dançar e cantar la cançon de La bèla castanha (autor Laurenç Cavaillé) per festejar l’arribada de la davalada! Èrem fièrs de presentar lo nòstre trabalh e de partejar aqueste moment convivial amb los parents.

A la fin, partegèrem lo nòstre tresaur e rintrèrem a l’ostal los uèlhs e lors còrs gaujoses.

Lo dijòus, quora tornèrem en classa, posquèrem faire cramar qualques castanhas e descobrir lo bon tast d’aqueles fruches de davalada.

La classa de l’escòla Calandreta Limosenca

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jornalet.com