La Cort de Cassacion a anullat lo plaçament en detencion de Christian Tein, militant independentista de Canaquia, en ordenant un novèl examen de son cas per una cort d’apelacion. Segon Le Figaro, aquela decision concernís tanben Steve Unë, un autre membre del movement canac. Cinc militants independentistas avián contestat lor detencion en metropòli, sospechats d’èsser implicats dins los trebols recents en Canaquia.

Lo transferiment nocturne dels militants en metropòli, efectuat a bòrd d’un avion especialament naulejat, suscitèt de criticas. Èran estats encarcerats dins diferentas presons de la França metropolitana, ont se tròban encara uèi.

Malgrat que la Cort aja estatuit al benefici de Tein e Unë sus de questions proceduralas, a pas ordenat lor liberacion, perque lo mandat de depaus demòre valid. Per contra, los recorses de tres autres militants, Dimitri Quenegei, Guillaume Vama e Erwan Waetheane, son estats rebutats.

Aqueles militants fan partida de la Cellula de Coordinacion de las Accions de Terren (CCAT), acusada d’èsser a l’origina de las susmautas que brandiguèron Canaquia, amb un bilanç tragic de 13 mòrts e de damatges estimats a mai de dos miliards d’èuros. Christian Tein, de 56 ans, se considèra coma un presonièr politic e contunha de negar las acusacions de violéncia.