Actualitats
Novèla sèria web: un viatge dins lei legendas sornas de Provença sus France 3
Leis episòdis, contats en provençau, somondràn una cabussada dins lei mites e lei creaturas pivelairas dau país
Tèxte legit
Leis aimadors de la fantasiá provençala an l’astre! A partir de uei, 26 d’octòbre, lei rets sociaus de France 3 Provence-Alpes aculhiràn una sèria web presentada per Amy Rouméjon Cros, jornalista per l’emission Vaquí, çò rapòrta Aquò d’Aquí.
Amb d’episòdis tenchats de negre, la sèria explora lei mites e lei creaturas pivelairas de Provença: dei Dracs ai Matagòts ò la masca misteriosa de Ròia.
Leis episòdis, contats en provençau, somondràn una cabussada dins aqueleis istòrias espaventosas e captivantas. La difusion comença sus TikTok uei dissabte 26 d’octòbre a 18 oras, abans de s’espandir sus Instagram, Facebook e YouTube. Leis episòdis seràn tanben disponibles sus lo sit web de France TV, acompanhats d’articles l’endeman matin a 6 oras.
Vaicí lo calendier deis emissions:
Episòdi 1: dissabte 26 d’octòbre sus lei rets sociaus, e dimenge 27 d’octòbre sus lo sit de France TV.
Episòdi 2: dijòus 31 d’octòbre sus lei rets sociaus, e dijòus 31 d’octòbre sus lo sit.
Episòdi 3 : dissabte 9 de novembre sus lei rets sociaus, e dimenge 10 de novembre sus lo sit.
Episòdi 4 : dissabte 16 de novembre sus lei rets sociaus, e dimenge 17 de novembre sus lo sit.
Episòdi 5 : dissabte 23 de novembre sus lei rets sociaus, e dimenge 24 de novembre sus lo sit.
Preparatz-vos a descurbir de legendas tant intrigantas coma inquietantas, per consomar sensa moderacion durant aquesta autonada.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Quin plaser d'ausir lo texte legit de l'article ! ...dins un bon occitan de Provença.....ont los "an" se prononcian encara "an" (captivanta, tanben, intriganta, inquietanta...),... lo "in " - in; e non "èn"
alara que, a l'escota de la legenda ( a l'origina o represa del "Poèma dáu Ròse" de Mistral) ...s'ausisson pas que de "an" que semblan de "òn", coma n'es la tendencia en francés..
Es que devèm seguir las tendencias de mòda en francés?
Es que, de tant coma sèm parasitats pel francés...a ne perdre l'accent de mai en mai quand parlam aquela lenga....sèm venguts incapables de percebre nòstras errors de prononciacion ?
de gramatica? de sintaxi? ...en clar..de tot çò que fa la sal de la lenga...
E i a sovent lo de qué de se demandar s'avèm a de bon enveja de transmetre una lenga especifica e vertadièira e non pas un "occifran" de farlabica..
Solide qu'es pas aisit - polluits coma sèm pel francés, d'èstre attentius al nòstre biais de parlar en occitan....mas es un dever per los que se pensan de conéisser la lenga, e un imperatiu per los que la vòlon parlar publicament, dins los medias...etc
Parli pas aquí pels novèls aprenents...a n'eles, lor tiri lo berret....qu'an la volontat d' aprene una lenga pas mai socialisada, per retrobar la lenga de lors reires, o s'integrar prigondament dins lo pais que los aculhis...
Pel cas que d'unes se pensarián,que, estent d'Albi, fau lo bavard ambe un sentiment de superioritat lengadociana....precisi que mas remarcas valon per tot l'espaci occitan...que la lenga de Pelhon, o la de Delpastre...me pertòcan tant coma la qu'ai pels ausidors dempuèi drollet
Fòrça curiosa de veire aquelei vidéos que seràn segurament de qualitat. Amy fuguèt emplegada de TèVé Òc pendent d'annadas e i faguèt un trabalh de tria. Sei reportatges son de regardar sus teveoc.com o Youtube.
Òsca Amy/Amada que contunha de faire clantir nòstra lenga d'òc !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari