Disi los Blaus, mas dimars 22 a Domèc, l’esquipa de França joguèt amb de malhòts cerclats blanc e roge. Mai classic dissabte a Sant Estève: malhòt blau, braietas blancas e debasses roges, mas amb l’abséncia de l’escapulari qu’es la marca istorica del XIII.

Dimars, en primièr, Galas dominèt Serbia 48-0. Ucraïna poguèt pas res fàcia a França: 8-74. De jogaires jaune e blau èran en permission del front per jogar la partida. L’esquipa de França èra compausada d’exiliats en Anglatèrra e de jogaires del Super-XIII.

Dissabte, a Sant Estève, de jogaires dels Dragons prenguèron la plaça dels societaris del Super-XIII per afrontar Galas.

Los Diables Roges foguèron valents mas prepausèron un jòc estereotipat a la diferéncia dels Blaus que prenguèron mai d’iniciativas ofensivas e capitèron qualques relanças: 20-6 a la pausa e cinc ensages de mai dins lo segond temps per una victòria 48-6. Per clavar la jornada, Serbia dispausèt d’Ucraïna 50-10.

França a encara una estapa de passar per disputar la competicion mondiala en 2026 en Austràlia e Papoa. Disputar un torneg a la tardor de 2025 amb Jamaica, l’Africa del Sud e las illas Cook. Los primièrs dos se ganharàn la bilheta per la fasa finala.

En XIII-cadieral, a Wigan, Anglatèrra domina França 66-33.

L’ora del revenge

Anglatèrra ten totjorn en travèrs de la garganta la desfaita al punt en aur en mièja finala de la Copa del Mond passada fàcia a Samoa. Ongan, los samoans venon jogar dos tèstes en Anglatèrra. Aqueste dimenge, a Wigan, los angleses batèron los samoans: 34-18. Segonda partida: dissabte que ven a Leeds.

En Pacific Championship, Fiji batèt las illas Cook: 56-6. Los neozelandeses recebián los Cangorós. Avián demandat a Shaun Jonhson de sortir de sa tota novèla retirada per la partida. Los australians s’impausan 22-10.

Cò de las femeninas, victòrias egalament de Fiji 18-6 e d’Austràlia 14-0.

La marrida plaça pel Tolosa Olimpic

Dimècres, la societat IMG rendèt son verdicte. Aviá establidas de nòtas en foncion de las resultas esportivas, dels budgets, de la qualitat dels estadis e de la preséncia dins la comunicacion (television, rets socials,etc.). Los primièrs dotze serián dels 12 que jogarián en Superliga en 2025. Tolosa Olimpic obten la… tretzena nòta e demòra doncas en Championship.

Lo classament cambia pas res a la realitat esportiva, vist que Wakefield, venceire del Championship, remplaça en Superliga Londres qu’aviá acabada la sason en darrièra posicion. Los Dragons son en seisena posicion darrièr los istorics St Helens (1r), Wigan (2d), Leeds (3n), Warrington (4n) e Hull KR (5n).

Supèr-XIII: segonds mièges temps decisius

Pel compte del Super-XIII, aprèp un mièg temps equilibrat (12-12), Carcassona prenguèt lo pas sus Sent Gaudenç 40-16. A Pià, catalans e Limós son a egalitat a la pausa e, fin finala, al benefici d’un darrièr quart d’ora catalan, Pià ganha 28-18. Fàcia a Avinhon, Tolosa mena 8-6 a la pausa, mas pèrd: 8-18. En Roergue, Lesinhan mena a la pausa: 10-6, abans de s’inclinar: 16-21.

La cinquena jornada veirà las oposicions:

• dissabte 2 de novembre: Avinhon-Carcassona, Vilanòva-Tolosa, Albi-Dragonets

• dimenge 3: Limós-Vilafranca, St Gaudenç-Pià.