Gràcia ais esfòrç de marselhés que vòlon passar sa lenga a seis enfants, amb lo sosten de la Confederacion Calandreta, de la Federacion de Provença e de collectivitats localas, una escòla immersiva en occitan provençau es a espelir non luench dau Pòrt Vièlh de Marselha, dins lo quartier de la Vileta, entre la Jolieta e Sant Mauron.

Marselha, mai granda vila dau Miegjorn

En Occitània tota, la vila mai poblada es Marselha, amb quasi nòu cents mila estatjants sus lo territòri comunau e un milion nòu cents mila estatjants dins sa metropòli.

Aquesta granda vila es lòngtemps estada fièra de sei cultura e lenga occitanas. La mai anciana vila grèga de França, onte s’atròba la mai anciana cambra de comèrci dau Monde, es un endrech ric istoricament, culturalament e economicament. A Marselha s’ause de pertot la musicalitat de l’occitan, mai malaürosament es negada dins lo biais marselhés de parlar francés.

Se pòu observar un escafament culturau accelerat dins la vila. Un bon biais de luchar còntra aquesto fenomèn seriá d’aguer d’escòlas immersivas en lenga regionala dei Godas fins a l’Estaca.

Lo fach qu’aquesta lenga vernaculara s’esconde de mai en mai darrier dei biais de parlar francés, es una empacha qu’ajuda pas la populacion provençala a fòrça nivèus.

Dins una granda vila rica de la diversitat culturala de sa populacion coma Marselha, aquesta lenga occitana, s’èra mestrejada e parlada per l’ensemble de la populacion, seriá un ponch comun a toei leis estatjants, encara mai difús que la passion per l’Olimpic de Marselha ! Seriá una vertadiera respelida generala, se Marselha podiá tornar utilizar sei cultura e lenga istoricas per faire viure sa cultura populara dau mesme biais que dins leis impressionants pòrts cosmopolitas pas tant luenchencs que son Nàpols e Barcelona.

Se coneissètz de monde que serián interessats de marcar seis enfants o ajudar lo projècte: bureu.deigabians@calandreta.org.