Una còla internacionala de scientifics a identificada una novèla entitat biologica dins lo microbiòma uman, çò rapòrta Vilaweb. Aquela descobèrta poiriá cambiar nòstra compreneson de la vida microbiana, perque se situa entre los virus e los viroïdes, sens ça que la aperténer a un o l’autre d’aqueles grops d’agents infeccioses. Aquela descobèrta, publicada dins la revista Cell, lèva de questions ineditas suls escalons de la vida e es a mand de modificar nòstra concepcion de l’escala biologica sus Tèrra.

L’obelisc, nom balhat a aquela novèla forma biologica, dont l’estructura simpla e alongada ramenta una bagueta, possedís de genòmas plan corts, de mai o mens 1000 nucleotids, fòrça inferiors als dels virus. Malgrat qu’infècten principalament de bacterias, los cercaires excluson pas que pòscan tanben afectar d’organismes mai complèxes.

L’estudi, realizada a partir d’analisis bioinformaticas, a revelat qu’aquelas novèlas entitats biologicas fan partida de nòstre microbiòma, un ecosistèma microbian complèxe compausat principalament de bacterias, aital coma de fonges, de protozoaris e de lors parasits, coma los virus. Aquel ret biologic complèxe jòga un ròtle essencial dins nòstra santat e es responsable de malautiás metabolicas, coma l’obesitat e lo diabète, aital coma de trebolss autoimmuns e de malautiás mentalas.

La recèrca dirigida pel prèmi Nobel Andrew Fire, de l’Universitat de Stanford, a mostrat qu’aqueles obelisques existisson dins divèrses environaments del mond entièr, sustot dins los microbiòmas umans e animals, las aigas e los sòls. Per la biologia, aqueles obelisques poirián dobrir una “novèla pòrta”, en ofrissent potencialament de pistas cap a una compreneson melhora de l’origina de la vida e de las interaccions microbianas globalas.