L’èx-president bolivian, Evo Morales, a anonciat qu’entamenava una cauma de la fam fins que lo govèrn dirigit per Luis Arce accèpte de participar a una taula de dialòg amb mediacion internacionala. Segon 3Cat, ara fa 20 jorns que Morales s’es encastelat dins la region de Cochabamba, un de sos bastions, per escapar a un òrdre de detencion ligat a d’acusacions grèvas, dont d’abuses de menors e un trafec de personas.

La situacion es venguda explosiva, amb de grops armats seguidors de Morales qu’an atacat de casèrnas militaras, pres de soldats en ostatge e blocat las estradas d’accès a la region. En responsa, lo govèrn bolivian a mobilizat 3 000 policièrs e militars, en procedissent a l’arrestacion de 66 personas. Morales a exortat sos partisans a reduire la pression per evitar “d’actes de sang”.

L’ostilitat entre Morales e Arce, ancians aliats, s’intensifica. Lo president Arce a denonciat las accions dels “evistas” coma una traïson. Morales, el, acusa lo govèrn d’aver temptat de l’assassinar pendent una recenta emboscada patida a Cochabamba.

La tension es alimentada per d’enjòcs politics prigonds, amb Morales que cèrca de se tornar presentar a las eleccions, mentre qu’Arce invòca un jutjament de la Cort Constitucionala per empachar son retorn. En tela de fons d’aquel conflicte, i a quitament una disputa pel lideratge de l’esquèrra boliviana. L’ÒNU seguís la situacion de près e crida las doas partidas a la moderacion, en metent l’accent sul respècte dels dreches umans per evitar l’escalada de la violéncia.