A partir deu 1r de seteme, lo Paulo e lo Jordem, dus liceans de l’IES Narcís Xifra de Girona, passèn un mes sancèr au licèu de l’Isla de Baish (Savés). Lo Paulo angoc entà la familha de la Lou e lo Jordem entà pair e mair de l’Emma.

Puish deu 1r d’octobre dinc a Totsants, estoc lo torn de las duas liceanas de Josèp Savèrna, de 17 ans, d’anar au Principat de Catalonha.

L’originalitat dins aqueste escambi Erasmus long veng de las lengas que serviscón de basa a l’escambi: l’occitan e lo catalan. La Lou e l’Emma hascón tota la lor escolaritat en seccion bilingua occitan-francés a l’Isla de Baish. Lo Paulo e lo Jordem, d’origina brasilèra, estón escoliats en catalan de petit enlà. Atau los dus Gironins de 17 ans tanben seguiscón tots los corses d’occitan deu licèu de l’Isla de Baish e las gojatas gasconas lo cors de catalan. De notar que los 4 liceans estudièn tanben lo castelhan e lo francés.

Ara, aqueth prumèr escambi veng de s’acabar e lo bilanç ei fòrça positiu. Au delà de l’experiéncia umana enriquidera, tots progressèn en occitan e en catalan. Mès çò de mei estonant estoc lo capatge d’aquestes gojats a hèr comparasons lingüisticas de las finas. Per exemple, lo Jordem e lo Paulo s’interessèn a la caijuda de la N intervocalica en gascon o deu tractament de l’L finala dens las lengas latinas. Entà mílhor díser, son los liceans que portèn aqueras questions gramaticaus e non pas lo professor. Questions e debats d’aquera traca son pas abituaus en classa de prumèra... La Lou e l’Emma participèn a la vida deus corses en tot joglar entre las diferentas lengas.

De notar tanben, e aquò ei ua fotografia realista de la Catalonha e de l’Occitània actualas, que quasi tots los liceans venguen d’autas regions e païses. Pròva que lo catalan e l’occitan pòden ajudar los nòstes joens a s’integrar autament d’un biaish intelligent. Se pòt díser tanben que l’occitan gascon a quasi desaparegut de l’usatge a l’Isla de Baish e que lo catalan a tanben fòrça arreculat dens l’usatge a Girona. Sovent la lenga usada entre liceans a Narcís Xifra de Girona ei lo castelhan.

Aqueste escambi Erasmus long en occitan e catalan estoc portat per Marta Pasqual i Llorenç, de l’IES Narcís Xifra, e per Nicolau Rei Bèthvéder a l’Isla de Baish. Cau mentàver que totas las còstas, petitas totun, son presas en carga per l’Union europèa. Sense las familhas tot aquò seré pas estat possible. Estón disponiblas, atentivas e presentas entà que tot se passèsse plan.

L’Emma, lo Jordem, la Lou e lo Paulo, que son amics vertadèrs ara, vòlen contunhar d’escambiar. L’Emma e la Lou parlèn de hèr lor estudis en Catalonha. Lo Jordem e lo Paulo dilhèu a Tolosa.

En tot cas, aquestes escambis entre duas lengas minorizadas vesias son de popularizar e d’espandir.

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jornalet.com