Suspresa aqueste dissabte de ser, en Super-XIII, a Albi. Sus un còp de pè a seguir transversal dins las darrièras segondas de la partida, un ensag balha la victòria als Dragonets sus la pelena albigesa (20-16). L’an passat, los Tigres avián ganhadas totas las partidas sus lor pelena.

De vèspre, Avinhon suspreniá Carcassona amb dos ensages mas en 20 minutas los campions puntavan sièis ensages per menar a la pausa 32-12 e emportar la partida fin finala 32-24. Vilanòva recebiá Tolosa e fasiá la diferéncia dins lo segond temps (16-12 a la pausa e 32-12 al final).

Dimenge, St Gaudenç batiá Pià: 18-14. A l’Agulha, los Grizzlies menavan 18-6 a la pausa, mas puèi èran emportats per una formacion de Vilafranca al jòc mai viu e mai collectiu e pèrdon 24-34.

Al programa de la setena jornada, tres partidas se jogaràn aqueste dissabte 9: Tolosa-Dragonets, Carcassona-Vilanòva e Lesinhan-Albi; dimenge 10, Pià reçauprà Avinhon e St Gaudenç anirà a Vilafranca.

Lo revenge dels angleses

Aqueste dissabte, a Leeds, se jogava lo segond tèst entre angleses e samoans. Anglatèrra confirmava la victòria de la setmana passada en ganhant 34-16.

Austràlia-Tònga en finala del Campionat del Pacific

Dins lo campionat del Pacific, Tònga anava batre los Kiwis 25-24 e Papoa dominava las illas Cook: 42-20. Del costat de las femnas, Samoa batiá Fiji 16-12 e las neozelandesas ganhavan en Papoa 36-0.

Aqueste dimenge 10 de novembre, al CommBank Stadium de Sydney, quatre partidas seràn al programa:

• las finalas Austràlia-Tònga (òmes) e Austràlia-Nòva Zelanda (femnas)

• la qualificacion per l’edicion 2025 entre Nòva Zelanda e Papoa (òmes) e Samoa e Papoa (femnas).