Donald Trump es a mand de tornar prene la presidéncia dels Estats Units, segon los primièrs resultats de l’eleccion presidenciala, e coma o revendica lo candidat ultraconversator, tanben benastrugat per de dirigents estatals de tota la planeta. La victòria de Trump respond al sosten de la classa obrièra blanca, mas tanben al sosten creissent dels grops minoritaris, mai que mai d’òmes negres e ispanics, dins d’estats coma Florida e Arizòna, mai que mai pr’amor de son discors economic proteccionista e antimondializacion, amb lo qual a capitat d’atraire de vòtes dins los estats tradicionalament democratas de la cencha industriala.

Los democratas, amb Kamala Harris coma candidata, an menada una campanha centrista qu’es pas arribada de mobilizar de sectors electorals clau, coma las femnas e la populacion negra, del temps qu’assajavan d’atraire d’electors moderats decebuts del populisme ultradrechista trumpista. Aquela orientacion centrista a pas evitada la desfacha, dins un contèxt ont fòrça electors auràn priorizada l’estabilitat economica que la promet Trump dins un moment d’incertitud globala. Tanben de votaires progressistas, ecologistas e pròpalestinians se son alonhats de la candidata democrata, jutjada tròp tèbia e tròp favorabla a la política brutala d’Israèl.

La reüssida de Trump implica una reafirmacion de l’extrèm conservatisme als Estats Units. Amb de proposicions coma la proteccion de l’indústria estatsunidenca, lo barrament de las frontièras e l’aument de las mesuras antiimmigracion, sa victòria prevei de nòus desfises per Euròpa e d’autres partenaris comercials. Trump a ja anonciadas de possiblas sancions contra los produches de l’Union Europèa e de China, en linha amb una politica estrangièra que cèrca de favorir los interèsses economics estatsunidencs.

Se complican las guèrras en Ucraïna e l’Orient Mejan

Internacionalament, s’espèra que Trump durcisca las posicions envèrs China e l’Union Europèa, çò que poiriá menar a de nòvas tensions comercialas. A mai, son possible retirament de l’ajuda militara a Ucraïna e son sosten incondicional a Israèl, ja manifestat durant sa primièra presidéncia quand reconeguèt Jerusalèm coma capitala de l’Estat Ebrieu e non pas de Palestina, complican encara mai los conflictes regionals. Pasmens, lo president ucraïnés Zelenski, entre tantes autres caps d’estat o de govèrn del Mond, a felicitat Trump per son eleccion.

Sa victòria met tanben en evidéncia la creissença de l’extrèma drecha al nivèl mondial. Amb un discors antiecologista e reaccionari qu’amaga pas son vejaire supremacista contra las minoritats e sa resisténcia als progrèsses de l’egalitat de genre. Trump, sostengut per de personatges influents coma Elon Musk, torna a l’Ostal Blanc amb un poder afortit dintre lo Partit Republican, amb lo contraròtle del Senat, ont los democratas son estats vencuts.