Actualitats
Barcelona: l’Euroregion Pirenèus-Mediterranèa met en valor l’occitan e lo catalan
Per la commemoracion de son 20n anniversari, a soslinhada la promocion de las lengas e a remeses los prèmis OCCAT pels joves creators
Tèxte legit
L’Euroregion Pirenèus-Mediterranèa a commemorat son 20n anniversari amb un accent sus la cooperacion territoriala e las lengas occitana e catalana. Aital, dijòus passat, un eveniment a Barcelona festegèt pendent tota la jornada los dos decennis de collaboracion entre la region dicha Occitània, las illas Balearas e lo Principat de Catalonha. Dempuèi sa consolidacion coma Gropament Europèu per la Cooperacion Territoriala (GECT) en 2009, l’Euroregion s’es destacada dins de domenis coma l’innovacion, la recèrca, la cultura, l’environament e lo torisme.
Pendent la jornada, las repercussions de l’Euroregion foguèt mesas en valor e de visions de son avenir foguèron partejadas. Las institucions, la societat civila e los joves de tota Euròpa debatèron sul ròtle de las euroregions dins la cooperacion territoriala. Demest los subjèctes centrals, se remarquèt la promocion de las lengas occitana e catalana, amb una discussion amb de joves actors que se tenguèt en francés, catalan e occitan e beneficièt d’una interpretacion simultanèa. De soslinhar la participacion de la còla de País Invisible e de Gabrièu Pelisson, conegut per sa cadena YouTube Parpalhon Blau.
Dins la tantossada se decerniguèt los prèmis euroregionals de la lenga pels joves, amb la participacion del ministre regional catalan de la politica lingüistica, Francesc Xavier Vila Moreno, de la vicepresidenta de la region dicha Occitània, Nadia Pellefigue, e de la ministra regionala de la presidéncia de las illas Balearas, Antònia Maria Estarellas.
Demest los projèctes guierdonats en lenga occitana remarcarem lo trabalh que l’a fach Camilha Besaury per Ràdio Occitània, lo projècte auvernhat de Delfina, la còla de Pastissadura e los projèctes d’Instagram lengadocian Lo Ligam e aranés AranCult, especialament.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari