Una manifestacion amb l’eslogan “Sèm Catalonha Nòrd perque o volèm !” foguèt organizada a Perpinhan per celebrar la Diada de Catalonha Nòrd, çò rapòrta Vilaweb. La marcha comencèt a 16h00 sus la Plaça de Catalonha. Los manifestants desfilèron puèi per las carrièras principalas fins a la Paça de Verdun, ont se tenguèt un parladís politic.

Sus lor trajècte, la manifestacion s’arrestèt mai d’un còp ont de castells, las famosas torres umanas, foguèron bastidas. Un d’aqueles arrèstes aguèt luòc davant l’ostal de la comuna de Perpinhan, dirigit per l’extrèma drecha  francista de Louis Aliot qu’ignòra la realitat culturala catalana de la vila. Enfin, lo cortègi se diriguèt cap al Castellet, ont se faguèt las intervencions e la lectura del manifèst.

Pendent aquela mobilizacion, mai o mens 1 500 personas, segon los organizaires, exprimiguèron lor solidaritat amb lo pòble valencian en interpretant La Muixeranga, cançon tradicionala valenciana e imne representatiu dels Païses Catalans.

Aquel eveniment se ten cada annada per commemorar la signatura del Tractat francoespanhòl dels Pirenèus lo 7 de novembre de 1659, que permetèt l’annexion del comtat de Rosselhon al reialme de França. Las associacions organizairas (Òmnium Catalunya Nord, lo Casal de Perpinhan, l’Aire Nòu de Bao, lo Conselh de la Republica en Catalonha Nòrd e l’Assemblada Nacionala Catalana en Catalonha Nòrd) an ongan soslinhat la “fòrça” del pòble nòrd-catalan, e an cridat al respècte dels dreches nacionals, lingüistics e culturals nòrd-catalans, en revendicant un estatut politic distint.