Lo mes de novembre es pas favorable als albigeses. Aprèp la desfaita sus lor pelena fàcia als catalans, perdèron tanben aqueste dissabte a Lesinhan. Aprèp una tièra de tres desfaitas, los Verd e Blanc trapèron la motivacion necessària per batre los tarneses. Menant 14-10 a la pausa, tenguèron còp per ganhar 18-16. Los catalans s’impausèron aisidament a Tolosa: 30-10.

A Carcassona, los Canaris signèron sièis ensages jos una pluèja fina per batre Vilanuèva d’Òlt: 32-14.

Dimenge, Vilafranca pren l’avantatge sus Sent Gaudenç dins lo primièr temps (8-0) e resistís puèi per véncer 16-12.

La pluèja a agut rason de la partida Pià-Avinhon reportada en rason de l’estat del terren. Los pianencs jogaràn aqueste dimenge la partida arrestada a la pausa fàcia a Albi en rason d’un auratge. La partida començarà amb un avantatge dels vesitaires: 10-6 (marca al moment de l’arrèst).

Austràlia, reina del Pacific

Las doas formacions australianas emportèron aqueste dimenge a Sydney lo campionat del Pacific: los Cangoros menavan 14-4 a la pausa fàcia a Tònga, marcavan tre la represa e resistissián a las atacas tonganas per ganhar 20-14; victòria 24-4 per las Jilaroos fàcia a las Kiwi Ferns.

Èra pas lo jorn dels aucèls de paradís e de las orquidèas: los neozelandeses jogaràn l’edicion de 2025 aprèp lor victòria fàcia als papós 54-12; desfaita de las papós fàcia a las samoanas 12-34.

Las canadencas fan un pas cap a la participacion a la Copa del Mond de 2026 en batent las estatsunidencas 40-8 a Jacksonville. Demòra una plaça de ganhar en emportant un torneg l’an que ven entre Canadà, Irlanda, Fiji e Nigèria.

En 13-cadieral

Aprèp la desfaita fàcia als angleses a Wigan (33-66), l’esquipa de França de 13-cadieral afrontarà los irlandeses ( a Nantas, dijòus 21 de novembre) e tornarà trapar los angleses (dissabte 23 de novembre a Saint-Lô)