Mai d’una centena de personas foguèron arrestadas dimenge passat pendent una manifestacion pròpalestinana que comencèt a 14h a Amsterdam. Èra una protèsta contra lo comportament dels afogats del club israelian de fotbòl Maccabi de Tel-Aviv abans las susmautas de dijòus, quand los suportaires de l’esquipa foguèron la tòca d’una seguida d’atacas que lo govèrn israelian a condemnat coma un “linchatge antisemita”.

Los manifestants rapòrtan que los hooligans de Maccabi causèron fòrça degalhs e nafraduras, cantèron de cants antiarabis e despengèron de bandièras palestinianas durant las oras abans la partida de fotbòl que joguèron contra l'Ajax a Amsterdam, que s'acabèt amb una victòria de 5-0 per l'esquipa neerlandesa.

Los policièrs remandèron los manifestants e confisquèron de bandièras e de tambors, en mai d’arrestar los participants, que contunhèron de cantar d’eslogans. La polícia neerlandesa a explicat dins un messatge sus X qu’arrestèron los manifestants que refusavan d’abandonar la Plaça Dam per aver mancat a l’enebicion de manifestar.

La protèsta èra estada enebida per l’òrdre donat per la consolessa màger de la vila, Femke Halsema, que suspendèt lo drech de manifestar dins la vila fins a diluns. Segon lo mèdia neerlandés Parool, l’enebicion empachèt pas gaireben doas centenas de manifestants de s'acampar sus la Plaça Dam per exigir la liberacion de quatre detenguts qu’avián protestat contra los afeccionats israelians abans e pendent lo rescontre.

Los incidents avián començat dijòus après la partida de fotbòl amb un bilanç de mai d’una seissantena de detenguts e divèrsas personas espitalizadas. L’incident foguèt considerat coma d’antisemitisme de part de l’UE e l’estat d’Israèl, que repatrièt los suportaires israelians. De son caire, l’ÒNU condemnèt l’antisemitisme e lo fanatisme antimusulman.