CAPÇALERA PAIS INVISIBLE

Actualitats

EnvironamentInternacional

La debuta de la COP29 en Azerbaitjan amb una urgéncia per aténher d’acòrdis climatics

La conferéncia climatica de l’ÒNU aurà per objectiu de definir l’ajuda als païses en desvolopament per lor transicion energetica

Tèxte legit

Diluns passat, debutèt la 29a conferéncia climatica de l’ÒNU (COP29) a Bakó, dins un contèxt d’alèrta mondiala davant los efièches devastaires del cambiament climatic. Dins la region de Valéncia, la recenta DANA causèt d’estralhs tragics e istorics; las secadas extrèmas, los incendis de granda amplor e los recòrds de temperatura se multiplican pertot, rendent evidenta la necessitat d’accions urgentas.

La COP29, que durarà fins al 22 de novembre, a per tòca de definir los investiments dels païses desvolopats per sosténer los païses en desvolopament dins lor transicion energetica e per los ajudar a afrontar las catastròfas climaticas que sofriràn. Segon Sud-Ouest, los païses paures demandan de milièrs de miliards annadièrs, mas los païses occidentals jutjan aquò irrealizable. De son costat, Muxtar Babajev, president de la COP29 e ministre de l’ecologia d’Azerbaitjan, mençonèt “de centenas de miliards” dins son discors, mas sens precisions. “La COP29 es un moment de vertat per l’Acòrdi de París”, çò declarèt. L’Acòrdi de París, adoptat pels païses del Mond entièr en 2015, a per mira de conténer l’escalfament mondial a 2°C, e a perseguir los esfòrces per lo conténer a 1,5°C.

La cima suscita pasmens de resèrvas e met las ambicions adoptadas a París en dangièr. Azerbaitjan, òste del rescontre, es lun dels màgers productors de petròli e de gas, e a recentament arrestat de militants ecologistas, çò que causa de controvèrsias sus son implicacion dins los engatjaments climatics. Lo quite Babayev a bastit son experiéncia professionala dins l’entrepresa Socar, del sector petrolièr.

Dins una annada que poiriá èsser la mai cauda de l’istòria, la COP29 ven cruciala per definir d’accions comunas. Las doas setmanas venentas seràn decisivas per veire s’aquela cima marca una virada o se ven simplament una autra escasença mancada dins la lucha contra l’escalfament climatic.

 

 

 

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: JORNALET 2025

Comentaris

Lachaud
2.

Ente avetz vist un eschaurament climatic? 2024 es l'annada la pus frecha e la pus pluviosa dempuei plusors decenias dau mens per lo nòrd de l'Euròpe tresqu'en-za lo nòrd d'Occitania.
De mai las inondacions en Espanha tomban plan per aquela assemblada. Mas, en Espanha, me sei laissat dire que las bancas rachetan las terras inondadas e lo paisan espanhòl se vei obligear d'emigrat vers lo nòrd. L'eliminacion daus paisans continua. Vivrem dins de las vilas ente aurem tots mas puna libertat de pensadas. Minjarem daus produchs fabricats per las bancas (o los que las dirigean) es a dire daus insectes alaidonc que fau suprimar lo bestial qu'a fach viure de las generacions de monde dempuei la nuech dau temps. Deja Intermarchat a sa propra produccion agricòla.

  • 0
  • 0
Jòrdi Caldentey Manacòr (Malhòrca
1.

Fins que vendrà un estiu que i aurà de milions de mòrts de calor ò de set, l'idustrialconsumisme s'aturarà pas d'empoisonar lo mond. E encara las mòrts de calor cal que sian de blancs, d'occidentales, europencs ò amerians. Se son ò d'africans ò d'asiatics, non passarà pas res e tot contunharà parièr.

  • 0
  • 0

Escriu un comentari sus aqueste article