En junh, la NASA balhèt a SpaceX la mission de desvolopar un “US Deorbit Vehicle”, un veïcul de desorbitatge espacial destinat a mandar l’Estacion Espaciala Internacionala (EEI) dins l’atmosfèra terrèstra, çò rapòrta Fanpage. L’objectiu d’aquela mission, que deu èsser realizada d’aicí a 2030, es doncas de far sortir l’EEI de son orbita e de la menar de faiçon securizada, per tal d’evitar que tombe d’un biais incontrarotlat.

La primièra estapa d’aquela operacion foguèt fa gaire acabada amb capitada: lo vaissèl Cargo Dragon d’SpaceX, amarrat a l’EEI, aluquèt sos motors pendent 12,5 minutas. S’agís de la primièra experiéncia d’alucatge dels propulsors mentre que la capsula es encara estacada a l’estacion. Aquela estapa marca una avançada significativa dins lo projècte d’SpaceX per tornar l’EEI dins l’atmosfèra, un procediment que necessitarà una quantitat bèla d’energia per garentir un retorn securizat de l’estacion.

En julhet de 2023, la NASA atribuiguèt a SpaceX un contracte de 843 milions de dolars per desvolopar l’US Deorbit Vehicle. Aquel vaissèl serà esquipat de 46 propulsors Dragon, contra los 18 de la version Cargo, e serà capable d’empénher l’EEI cap a un luòc isolat dins l’ocean Pacific, près del Ponch Nemo, una zòna acantonada de la mar situada a mai de 2500 km de la tèrra mai procha.

La NASA a soslinhat l’importància istorica de l’EEI, que poiriá èsser parcialament recuperada per conservacion o analisi tecnica. Lo plan de destruccion de l’estacion es doncas una question de seguretat perque, sens assisténcia, riscariá de tombar de faiçon incontrarotlada sus Tèrra. Enfin, la NASA prevei de remplaçar l’EEI per d’estacions espacialas privadas, en finançant lo desvolopament d’entrepresas dels Estats Units pel biais del programa “Commercial LEO Destinations” (CLD).