Lei tres jorns dei Rescòntres Jòrgi Gròs a la Placeta de Nimes fuguèron una capitada dei bèlas. Pascal Marconat e son grop MASC avián perfiechament organizat l’eveniment au Petit Théâtre e au Fogau Albaric o encara sus la Placeta amb la mòstra de fotografias de Philippe Ibars. L’Ostau de la Region fuguèt comol per l’estrena de la mòstra sus l’escrivan e contaire Jòrgi Gròs, e Benjamin Assié i prenguèt la paraula en occitan, lenga cara a Jòrgi e sa familha. Leis intervenents dei tres jorns fuguèron perfiechs, e contaires, musicaires o animators testimonièron de la riquesa de l’òbra de Jòrgi Gròs (veire lo programa sus Internet). Un libre novèu nascut deis inedichs de l’autor fuguèt presentat, Lei camins de Michèu l’Ardit, lo Michelon que l’aimava l’autor. Fau dire que leis inedichs mancan pas e que serà mestier de lei faire paréisser. L’autor tròp modèst o faguèt pas, a nosautrei d’o faire.

En tot cas, es de desirar per l’an que vèn de rescòntres novèus, tan rics coma aquelei d’aquesta primiera version.