Lo 13 de novembre passat, lo ministèri public requeriguèt una pena de cinc ans de preson, dont dos ans fermes, contra Marine Le Pen, per son ròtle presumit dins un vast escàndol de malversacion de fonzes publics europèus, çò rapòrta Le Monde. Lo procuraire a tanben reclamats 300 000 èuros d’emenda e cinc ans d’ineligibilitat, amb una execucion provisòria de la pena a causa de la gravetat dels faches. Aquelas requisicions intervenon après mai d’un mes e mièg d’audiéncia al tribunal correccional de París, ont lo ministèri public a denonciat l’implicacion de Le Pen e de mantun membre del Recampament Nacionala (RN) dins una frauda qu’aviá per mira d’utilizar de fonzes europèus a de fins personals.

Otra l’èx-presidenta de l’RN, tres còps candidata a la presidenciala francesa, de penas de preson e d’inelegibilitat son estadas demandadas contra 24 autres acusats, dont de deputats e assistents del partit. Demest eles, Louis Aliot, cònsol màger de Perpinhan, se vei reclamar 18 meses de preson, dont 12 amb ajornament, aital coma 30 000 èuros d’emenda e tres ans d’ineligibilitat. D’autras figuras politicas, talas coma Julien Odoul, Nicolas Bay e Bruno Gollnisch, son tanben miradas per de requisicions sevèras, amb de penas de preson e d’emenda similaras. L’acusacion desira d’autre caire que lo quite partit, perseguit coma persona morala per complicitat de malversacion de fonzes publics europèus, siá condemnat a una emenda ferma de 2 milions d’èuros.

Marine Le Pen, en reagissent fermament a las requisicions, denoncièt de “violencia” dins la demanda d’execucion immediata de las penas d’ineligibilitat, çò que, segon ela, auriá de consequéncias grèvas sus sas ambicions políticas. D’efièch, se la pena d’ineligibilitat foguèsse confirmada, Le Pen seriá empachada de se presentar a l’eleccion presidenciala venenta. Segon France Info, la setmana passada Le Pen aviá ja exprimidas sas crenhenças d’una tala pena: “Comprenètz que dins lo cas que me concernís, una automaticitat a evidentament de consequéncias fòrça grèvas. Aquò auriá per efièch de me privar d’èsser candidata a la presidenciala, vaquí”, çò diguèt.

Lo procès se perseguís fins al 27 de novembre, après qué los jutges metràn lor jutjament en deliberat. Un relambi que poiriá prene mantuna setmana, quitament mantun mes.