Los pelegrins de l’entraïnament

Los Dragons Catalans an entamenat lor entraïnament en vista de la sason 2025. Coma la pelena de Brutus es en tractament per èsser enfin en bon estat, los jogaires son obligats de s’entraïnar sus d’autres terrens. La comuna de Perpinhan prepausa pas de solucion; cèrtas municipalitats vesinas privilègian lors formacions; consequéncia: per ara, los Dragons se passejan. Se son entraïnats a Toluges, puèi a Cabestany … Benlèu pas las melhoras condicions!

Aqueste diluns 18 de matin, un dejunar èra previst amb los sostens per la dobertura de la campanha d’abonaments per la sason novèla.

Eliot Whitehead a ja tornat trapar Perpinhan aprèp sas sasons passadas a Canberra. Fa part dels 6 estrangièrs que jonhon Catalonha: Tommy Makkinson (Saint Helens); Nick Cotric (Canberra); Oliver Partington (Salford); Luke Keary (Sydney Roosters) e Pangai Junior (Redcliffe Dolphins)

La formacion a desvelat son malhòt per las partidas a domicili: los Dragons jogaràn en blanc amb un escapulari e margas en sang e aur. Classic e polit!

Los jogaires del Tolosa Olimpic van tanben reprene l’entraïnament en vista de la sason de Championship.

Designat coma melhor jogaire pels sostens, lo provençal Loís Jouffret a signat per una sason suplementària a Halifax ont jòga dempuèi 4 sasons, Lo pilar Justin Sangaré daissa Leeds e signa per doas sasons a Salford.

Un dèrbi Limós-Lesinhan per la ueitena jornada del Super-XIII

Aqueste dimenge, Pià e Albi se tornavan trapar aprèp la partida arrestada en setembre en rason d’un auratge bèl a la pausa. Albi començava amb un avantatge 10-6, mas a la pausa Pià aviá fait lo trauc en marcant 22 punts contra un sol ensag per Albi (28-14, doncas). Fin finala, los catalans ganhan 38-20. Albi marca lo pas amb aquesta tresena defaita de tira.

Aquesta dimenjada, se jogarà la ueitena jornada de la competicion. Doas partidas se debanaràn dissabte: Avinhon-Vilafranca e Albi-Tolosa. Dimenge, a Sant-Estève, los segonds (los Dragonets) reçaupràn los primièrs (los Canaris de Carcassona). A l’Agulha, se tendrà l’afrontament entre las doas formacions audencas en cèrca de punts: Limós e Lesinhan. La partida Vilanòva-Pià completa lo programa de la jornada.

En 13-cadieral

Aquesta setmana, l’esquipa de França de 13-cadieral afrontarà los irlandeses (a Nantas, dijòus 21 de novembre) e tornarà trapar los angleses (dissabte 23 de novembre a Saint-Lô) . L’internacional Jeremi Bourson qu’a jogat dins l’esquipa d’Halifax ongan fa part de l’esquipa de la sason de la Super-Liga de 13-cadieral.