L’ase catalan es vengut la novena raça de l’espècia oficialament reconeguda en França, un eveniment important obtengut après un decenni d’esfòrces menats per Delphine Danat, çò rapòrta Vilaweb. Aquela noiriguièra, darrièra gardiana de la raça en Catalonha Nòrd, gerís l’asenariá Kuleni a Pontellà (Rosselhon). Sa lucha solitària, sovent entravada per las administracions, a fin finala fach fruch gràcias al sosten del govèrn catalan.

Lo 5 de setembre, jos pression de la Generalitat de Catalunya, lo Ministèri espanhòl de l’Agricultura a acceptat l’estatut europèu de l’ase catalan, en obligant aital França de reconéisser oficialament aquela raça. D’ara enlà, lo Ministèri francés de l’Agricultura e l’Institut Francés d’Equitacion devon emplegar lo tèrme “raça d’ase catalan”, en bandissent las denominacions inapropriadas coma “ase dels Pirenèus”.

Aquela reconeissença dobrís la via a un sosten economic pels noiriguièrs, e poiriá encoratjar la salvagarda d’aquela raça menaçada, amb solament qualques centenas d’individús dins lo Mond. Segon Danat, l’ase catalan es un avantatge per l’agricultura, capable de trabalhar dins de zònas escalabrosas e d’accèsses malaisits. Ofrís tanben un potencial toristic considerable: malgrat l’abséncia de publicitat, l’asenariá Kuleni atira cada an mai o mens 2500 vesitaires.

Danat collabòra amb Joan Gassó, noiriguièr en Catalonha Sud, per preservar la raça gràcias a d’escambis genetics.