De hèit, per abriu de 2012, uèit de las nau napas libras observadas en Gironda presentan una haussa deu nivèth de la napa. Tres estacions (Latresna, Lo Tèmple, Lenton) se tròban quitament dessús lo nivèu mejan. Mès las autas demòran jos aquera mejana, e las estacions de Saucatz e de Peçac se situan a un nivèth hòrt baish, segon los comentaris deu SIGES.

 

La situacion es comparabla dens tota Aquitània. Las plujas excepcionalas d'abriu conjugadas a la honduda de la nèu, an tirat lo pais deu sequèir que menaçava, après un periòde long shens precipitacion. Hòra de las observacions de St Joan d'Ilhac e de Portèth (Lana Gran), que los nivèths baishan o se mantenen, totas las estacions mesuradas amuishan una augmentacion deu nivèth freatic. Sovent en demorar mei pròche de las observacions mei baishas, ça que la.

 

 

 

Après un mes de març qualificat de critic per la Direccion Regionala de l'Environament, de l'Amainatjament e de l'Alotjament (DREAL), lo debit mejan deus flumes presenta uèi-lo-dia una situacion pròcha de la normala. Mercès a las precipitacions, excedentàrias per Aquitània en abriu, la situacion se milhora hòrt, atau. Passam d'un ecolament que plaçava 2012 demiei las annadas mei secas (d'aqueras que tornan cada cinc o dètz ans) a un ecolament plaçat a l'entorn de la mediana. Totun, la quantitat mendra de precipitacions dens lo parçan de Tolosa empacha Garona de tornar trobar son nivèth acostumat. Los relevats deu mes de mai, que seràn publicats a la debuta de junh, diurén confirmar aqueras observacions, efectuadas en partida avant la fin deu periòde de plujas.

 

 

 

Pèir-Joan Masdiset