L’activista tunisiana Amina Asbui a anonciat que quita lo collectiu feminista Femen. En de declaracions a l’edicion maugrabina de l’Huffington Post, Asbui diguèt que voliá pas que son nom foguèsse restacat a una “organizacion islamofòba”. Amina reprochèt a Femen qu’empleguèsson de lèmas coma “Amina akbar” (Amina es granda) o “Femen akbar”, per rapòrt a la formula “Allahu akbar” (Dieu es grand), qu’emplegan abitualament los musulmans.
 
L’activista critica tanben que las activistas del grop ajan cremat davant l’ambaissada tunisiana a París una bandièra negra amb lo lèma “I a pas d’autre dieu que Dieu e Maomet es lo sieu profèta”, formula emplegada pel mond musulman coma profession de fe. “Aquò ofensèt fòrça musulmans e fòrça parents mieus. Cal respectar la religion de cadun”, çò disiá.
 
Al delà, Amina ditz que tanben quita Femen perque sas accions son estadas contraproductivas dins son país e perque considèra que lo finançament es “dobtós”; segon ela, poiriá provenir d’Israèl. Amina confirmèt sa decision de quitar Femen en de declaracions a Tunisia Live.
 
Femen confirma, sus son sit web, sa rompedura amb Amina Asbui (alias Amina Tyler) “per de diferéncias d’opinion sus las tacticas dins los païses islamics”. L’organizacion crei que la decision d’Amina “es desonèsta per rapòrt als esfòrces que s’es fach per sa liberacion”.
 
Amina es a l’ora d’ara en libertat condicionala. L’acusan d’aver profanat una sepultura per aver escrich lo nom del grop feminista sus la paret d’un cementèri a Cairoan, a qualques 150 quilomètres al sud de Tunis. La tòca del tag èra de denonciar una reünion salafista que se debanava près d’ailà.
 
La setmana passada foguèt tornarmai detenguda per aver lançat d’uòus e de pintura contra lo sèti del Ministèri de la Cultura tunisian. O faguèt amb lo grop anarquista Atac Feminista en solidaritat amb l’actor Nasraddin Shili, jutjat per aver lançat un uòu al ministre de la cultura tunisian Mahdi Mabruk.