capçalera campanha

Actualitats

EconomiaEnvironamentInternacionalPoliticaSocietat

Almens 200 agricultors blòcan l’autoestrada A9 al Voló

Los agricultors, que bloquèron la frontièra amb Espanha un jorn entièr, protestavan contra la signatura de l’acordi comercial d’Euròpa amb lo Mercosur

Tèxte legit

Las manifestacions agricòlas an fach lor retorn en Catalonha del Nòrd. Lo dimars 19 de novembre, los pageses, convocats per la Coordinacion Rurala, bloquèron l’autoestrada A9, après s’èsser amassats al peatge del Voló, en Rosselhon, çò rapòrta L’Indépendant. Afortits per de delegacions del Bas Lengadòc, los manifestants comencèron d'empachar lo passatge dels camions de miègjorn enlà, en verificant las mèrças transportadas per d’unes d’eles, en arribant quitament fins a voidar de lor contengut dos camions cistèrna que transportavan de vin blanc espanhòl. Los agricultors levèron fin finala lo blocatge l'endeman d'après-miègjorn.

Los pageses rotestavan contra las dificultats creissentas de lor profession e, sustot, contra l’acòrdi comercial amb lo Mercosur (union economica entre Brasil, Argentina, Uruguai e Paraguai), que poiriá significar una associacion entre aqueles païses d’America del Sud e Euròpa. Malgrat que França aja pas encara ratificat aquel acòrdi, los agricultors estiman que seriá nefast per lor sector. Aquelas mobilizacions faguèron seguida a las manifestacions de genièr e febrièr, qu’avián ja mes lo govèrn jos pression. Los agricultors deploran l’ineficacitat de l’executiu a respectar los engatjaments preses après aquelas precedentas protèstas.

Los sindicats majoritaris FNSEA e Joves Agricultors, que participèron pas a aquel barratge, an anonciat d’autras mobilizacions pels jorns avenidors, en particular una accion a la frontièra amb Espanha lo 25 de novembre, se n’an pas cap de responsa de la ministra de l’agricultura Annie Genevard, e poirián intensificar los blocatges se'n tròba pas pas cap de solucion lèu. Pasmens, Philippe Maydat, president de la Coordinacion Rurala 66, planhiá qu’aqueles sindicats aguèsson decidit d'esperar per agir: “Sêm decebuts que los autres sindicats nos ajan pas jonches”, çò diguèt.

Aquela situacion perturbèt l’activitat economica locala, en afectant las entrepresas e lo mercat internacional Sant Carles de Perpinhan, qu’aguèt de faire fàcia a d'alentiments importants e a l’arrèst de las liurasons.

 

 

 

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

Lachaud
1.

Lo movament occitaniste porria s'engagear un pauç mai dins lo sosten a d'aquelas manifestacions e non demorar coma davant un match de rugbi a epiar qui vai ganhar.. Es pas solament una revendicacion categoriela. L'agriculture tòca tots los secteurs economics a començar per la ruralitat. Pas de campanha sans paisans. Pas de santat sens paisans. Pas d'ecologia sens paisans. pas de developament economic sens paisans.
De mai quò es una question de democracia. L'euròpe que devia far una euròpa de las nacions solidairias a fach un empire fasciste ente las decisions apartenan a las grandas societats internacionalas qu'an ren a fotre de l'individu mesme de la nacion o partida de la nacion. I a que lo compte bancaire daus accionaris qui trobaran son compte.
De mai França es ruinada, coneis la crisa economica e son governament a pus de poder qu'es gerat directamenr pe l'Euròpe dau temps que los medias son sos lo contròli de la censura.
Es temps de tornar trobar lo temps d'Occitania en lucha (revòlta paisana de 1907).
Lo silenci de las pantoflas es pire que lo bruch de bòtas. Aurem l'aer fin davant l'istòria occitana si disiam ren.

  • 0
  • 1

Escriu un comentari sus aqueste article