Emmanuel Macron a tornarmai exprimida sa concepcion de la diversitat lingüistica. Pendent la presentacion de la novena edicion del diccionari de l’Acadèmia Francesa lo 14 de novembre passat, afirmèt (29’24) que las lengas autoctònas del territòri francés dichas regionalas èran “un instrument de division de la nacion”, çòrapòrta Mediabask. Segon el, la lenga francesa es estada lo factor clau de l’unitat del país, mentre que las lengas regionalas, talas coma los “pateses”, èran sorsa de division.

Aquel discors contraditz ça que la sas precedentas presas de posicion. En 2021, pendent la censura de l’ensenhament immersiu en lengas autoctònas non francesas pel Conselh Constitucional, Macron las defendiá en las qualificant de “tresaur nacional”. D’aquel meteis temps, soslinhava l’importància de lor preservacion e de lor ensenhament, en afirmant que res deviá pas entravar lor transmission e que las diferentas lengas del territòri francés,  que foguèsson metropolitanas o ultramarinas, enriquissián la “cultura nacionala”.

Mas Macron a mostrat mantun còp qu’a una vision tras que personala de la realitat lingüistica de França. En 2023, pendent l’inauguracion de la Ciutat Internacionala de la Lenga Francesa a Villers-Cotterêts, afirmèt que cada francés aviá drech de revendicar mantuna apertenéncia lingüistica e de transmetre sas lengas d’una faiçon “non negociabla”, mas faguèt tanben d’afirmacions aproximativas e enganairas sus l’occitan dins un discors ont mesclèt las “lengas regionalas” amb de concèptes coma “patés” o “argòt”. En 2018, ignorant de la realitat occitana, pretendèt que sos rèiregrands bigordans parlavan sonque “lo pirenenc”, coma satisfach que sa mairegrand l’aguèsse abandonat per passar al sol francés per venir directritz d’escòla.

Ara, sas declaracions a l’Acadèmia Francesa suscitan de reaccions entre los defensors de la diversitat etnolingüistica. Lo jornalista Michel Feltin-Palas recòrda que, istoricament, França es totjorn estat un país multilingüe, e que las tensions i son pas principalament ligadas a las lengas, mas a las diferéncias religiosas o ideologicas. “En afirmant que las lengas regionalas devesirián la nacion, Emmanuel Macron repren una retorica centralizaira eiretada de la Revolucion Francesa, qu’aviá fach de la lenga francesa un esplech d’unificacion al detriment de las lengas localas. Pasmens, aquela posicion sembla d’ignorar los esfòrces desplegats dempuèi de decennis per preservar aquel patrimòni immaterial”, çò declara.