Après lo succès dels primièrs sièis volums, ara es paregut lo seten volum de l’Istòria de la cosina catalana e occitana, aqueste còp consagrat als ragostes, los uòus e las pascadas. Es previst que l’òbra comprenga dètz volums e que siá completament acabada d'aicí a qualques d’ans. “Costarà una vida entièra, mas soi una persona fòrça pacienta”, çò declarèt l’autor, Vicent Marqués.

Nascut a Valéncia en 1950, Marqués es cosinièr e escrivan. A publicats de romans e de libres de cosina tradicionala. Fa aperaquí quaranta ans que comencèt la recèrca de donadas per escriure aquesta istòria de la cosina catalana e occitana que son quatren volum ven de sortir. Segon lo reputat cosinièr catalan Ferran Adrià, l’òbra es “una pèça d’art”.

Aqueste volum prepausa de centenats de monografias e de recèptas acompanhadas de cançons popularas, poesias e tèxtes. L’autor nos fa, en 925 paginas, un percors istoric, filologic, literari e cultural de qualques plats que configuran lo còrpus de la cosina que partejam lo mond d’Occitània e dels Païses Catalans. Malgrat que l’òbra siá editada en catalan, Jornalet publica en occitan qualques unas de las melhoras recèptas de la cosina occitana, en ne fasent un pauc l’istòria.

Lo segond volum, consagrat als topins e als legums, obtenguèt lo prèmi Best of the World dels Gourmand World Cookbook Awards.

Bon apetís!

MARQUÉS, Vicent. Història de la cuina catalana i occitana, vol. 7 Els guisats, ous i truites. Edicions Sidillà 2024, 925 paginas. 38 èuros.