Sembla surrealista, mas es vertat! Fins en 2015, en Islàndia, foguèt en vigor una lei del sègle XVII, que permetiá d’aucir de bascos, çò rapòrta The Local. Aquela lei èra un vestigi dels tempses ont los marins bascos e islandeses èra pas venguts gaire amics.

Tot comencèt a l'epòca de la caça a la balena, quand los bascos, expèrts dins aquel mestièr, collaboravan amb los islandeses e avián quitament desvolopat amb eles un pidgin bascoislandés per se comprene. Mas en 1615, una tièra de conflictes transformèt la cooperacion en asirança. D’escaramossas brutalas menèron a una decision extrèma: declarar los bascos fòrabandits d’Islàndia, e quitament autorizar de los tuar! Aquela lei demorèt intacta… pendent 400 ans.

Per astre, en 2015, Islàndia aboliguèt aquela legislacion violenta, e ara los bascos pòdon vesitar lo país sens cap de problèma. Mai encara, un musèu que ramentarà aqueles eveniments s’inaugurarà en 2025 a Djúpavik.

L’istòria, tant estranha coma pivelaira, nos remembra d’unas de las paginas mai complicadas de las relacions entre pòbles. Almens uèi, aquelas tensions son estadas remplaçadas per una curiositat culturala mutuala.