Çò qu’òm espèra d’un dèrbi es una partida acarnassida entre doas formacions vesinas. Foguèt pas lo cas aqueste dimenge a l’Agulha ont Limós recebiá Lesinhan. L’esquipa de Corbièras dobriguèt la marca amb doas penalitats, mas Limós fasiá circular la palma mai aviat per trapar los traucs dins la defensa advèrsa. Çò que capitèron de faire tres còps abans la pausa, ajudats pel tresen ensag per la recepcion d’un còp de pè de seguir completament mancada per l’arrièr vesitaire. 18-4 a la pausa. Lo segond mièg temps prenguèt jamai d’ample: Limós jogava tranquil e Lesinhan multiplicava las aproximacions. Limós ajustèt tres ensages transformats per ganhar: 36-4.

Una partida d’una autra dimension se jogava a Sant Estève entre lo primadièr Carcassona e sos dalfins dels Dragonets. Tres penalitats sancionavan de fautas audencas, puèi cada formacion marcava dos ensages per un avantatge 14-10 dels locals a la pausa. A l’ora de jòc, Carcassona passava davant amb un ensag transformat: 16-14. Anavan seguir quatre ensages marcats a una formacion locala desvariada e despassada que replicariá per un ensag sus intercepcion sus la còrna. Victòria dels audencs plan neta: 40-20.

Dissabte, Avinhon ganhava sa primièra partida a domicili de la sason fàcia a Vilafranca 22-12 alara qu’Albi se mostrava mai fòrt mas sens engèni per batre Tolosa: 30-12. Dimenge, gaire de punts marcats del costat de Vilanuèva d’Òlt ont los Leopards baton los pianencs 6-4: un sol ensag de cada costat e la transformacion que fa la diferéncia.

Pel compte de la novena jornada, dissabte 30 de novembre, Limós reçauprà Albi, e Sent Gaudenç anirà a Lesinhan. Son al programa del dimenge 1r de decembre: Carcassona-Tolosa, Vilafranca-Vilanòva e lo dèrbi catalan Pià-Dragonets.

Dragons: lo calendièr

Los Dragons e las formacions de Superliga an pres coneissença del calendièr de la sason 2025. De partidas de tria se jogaràn lo dijòus de ser a la demanda del difusaire, Sky-Sports.

Los Dragons entamenaràn la sason a domicili lo jorn de Sant Valentin (divendres 14 de febrièr) fàcia a Hull FC. Se gandiràn lo divendres seguent a Warrington.

Dins la sason, rescontraràn 3 còps: Hull FC, Huddersfield, Leigh, Warrington e Wigan . Lo dissabte 3 de mai, los Leopards de Leigh seràn los adversaris de la Dimenjada Magica que tornarà trapar l’estadi de Newcastle. Ramentem qu’ongan lo club escapa pas a la paga dels desplaçaments e de l’albergament de las esquipas anglesas e dels arbitres que venon en Catalonha. Atal, lo club a signat un partenariat amb una entrepresa Sport Travel encargada d’aqueste aspècte que representarà un còst d’un milion d’euròs.

13-cadieral: lo revenge

Lo mes passat, l’esquipa de França de 13-cadieral aviá suportat a Wigan la dominacion anglesa: 33-66. La setmana passada, rescontrava dijòus los irlandeses a Nantas: partida ganhada pro ben aisidament 62-20 (pausa: 34-6). Lo rescontre retorn fàcia als angleses foguèt, dissabte, d’una autra intensitat a Saint-Lô. Los Blaus menavan 18-12 a la pausa e resistiguèron dins lo segond temps per véncer 32-28 (5 ensages transformats e una penalitat contra 5 ensages e 4 transformacions).