Actualitats
Valls e Auyrault se son engatjats a redusir la violéncia a Marselha
Lo ministre de l’Interior a levat la polemica amb lo cònsol de la Ciutat Focèa
Lo govèrn francés es “engatjat a redusir la violéncia, la delinquéncia e lo crime” a Marselha, ont ongan 11 personas son estadas assassinadas, çò diguèt ièr lo primièr ministre francés, Jean-Marc Ayrault. “Cal refortir la seguretat per garentir la seguretat de totas las personas a Marselha e garentir lo retorn de la fisança”, çò diguèt lo primièr ministre que vesitèt la Ciutat Focèa.
Qualques minutas abans, lo ministre de l’Interior, Manuel Valls, anoncièt de mesuras addicionalas per refortir las unitats de la polícia, per ajudar e facilitar las recèrcas sul trafec de dròga.
En setembre de 2012, lo govèrn francés aviá ja mandat 230 policièrs addicionals per “restablir la seguretat a Marselha”, una ciutat que patís especialament un naut taus de caumatge e de salaris deficients.
Valls, Ayrault e dos ministres de mai vesitèron la vila dimars passat.
Polemica
Valls provoquèt la polemica dimars de matin en disent que la vila “es estada abandonada pendent d’annadas per l’estat coma per las collectivitats territorialas”. En respondent a la demanda del cònsol de Marselha, Jean-Claude Gaudin, que demandava de classificar l’ensems de la vila en zòna de seguretat prioritària, Valls expliquèt: “ai totjorn dich que serà long e malaisit. Se tua dempuèi d’annadas a Marselha. La mitat de la vila es en zòna de seguretat prioritària. Lo trafec de dròga gangrena aquesta vila (…) Qu’a fach lo cònsol de Marselha? Nosautres avèm mes de mejans considerables, amb 230 policièrs de mai.”
De son costat, Jean-Claude Gaudin planguèt “l’agressivitat del ministe de l’Interior e sas nombrosas vesitas” que, segon lo cònsol, “pòdon pas far oblidar la feblesa dels efectius de la polícia nacionala, sustot quand se compara a aqueles d’autras grandas vilas de França”.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
« Valls e Auyrault se son engatjats a redusir la violéncia a Marselha. » Perqué ? An decidit de n'acabar amb lo regim educatiu d'aculturacion francizanta per establir l'officialitat plen e totala qu'exclusiva de l'occitan a Marselha ?
#3 E òc, coma avem la màger part d'entre nosautres, l'electricitat via Electricité de France (EDF), devem se la calar per rengraciar lo centralisme (qu'es pas brica a París, vila santa après Ieroshalaïm, Roma e ma comunal nadala). Es evident, nos an aportat lo lume, los manuals escolaris e la bicicleta... Ts ts ts. Per los occitans del Pemont cal veire amb ENI e los araneses amb lor companhia d'Energia respectiva per saber s'an drech de renar còntra Roma e Madrid o pas cap.
òc, aquò es la fauta deus parisencs! Abans lo restacament de marselha a França (1481-1482), se parlava pas jamei de cambriolatge.Ara se'n parlan totjamei! Aquò es plan la pròva!
O benleu que dins l'encastre d'una competicion sensa nom entre París e Marselha, l'objectiu de lònga es de jetar lo discredit sus la ciutat mai emblematica d'Occitània. La rivala mediterraneana e equivalent de París per lo "sud de França"...
" quand se compara a aqueles [efectius] d’autras grandas vilas de França" mas perqué ne'n siam arribats fins an aquèu ponch ? La promiera ciutat d'Occitània seriá laissada a l'abandon perqué lei gents au poder a París an tròup legit çò que se diiá de Marselha dins L. F. Céline o vist lei films sus la vila ?
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari