Matthew e Michael Youlden son de bessons identics originaris de Manchester, en Anglatèrra. Segon la BBC, son uèi coneguts per lor incresible mestritge de las lengas, puèi que son capables de ne parlar 26. Aquela aventura comencèt amb l’espanhòl, qu’aprenguèron a l’edat de 8 ans pendent de vacanças en familha a Lanzarote, e a l’ora d’ara la lista s’espandís non solament a de lengas fòrça difusadas talas coma l’alemand, lo francés, lo danés o lo portugués, mas tanben a de lengas minorizadas coma lo gaelic irlandés, lo galèc o lo basco. Pasmen, lor lenga mai particulara es l’umeri, un idiòma que creèron dins lor enfança e que contunhan d’utilizar entre eles.

Lo fenomèn de lengatge partejat entre bessons, apelat “criptofasia”, es pas rar. Mai o mens del 30 al 50% dels bessons desvolopan un lengatge o un mòde de comunicacion unic, sovent ligat a una relacion particularament pròcha. Pr'aquò, al contrari de la majoritat dels bessons qu’abandonan aquel lengatge amb lo temps, los fraires Youlden an enriquit l’umeri al fil de las annadas, en lo tresmudant en una lenga complida. “Es un mejan natural de comunicar entre nosautres”, çò explican.

Aquela passion per las lengas, malgrat que començada tre lor jove edat, a presa d’amplor quand an començat d’aprene d’autras lengas, coma lo catalan après un sojorn a Menòrca. Lor interès per las lengas minoritàrias, talas coma lo romanch, fa pròva de lor desir de balhar de visibilitat a aqueles idiòmas. “Totas las lengas an una foncion importanta pels que las parlan”, çò soslinhan.

Uèi, los Youlden s’acontentan pas d’aprene de lengas, n’ensenhan tanben per lor entrepresa. Insistisson sus l’importància de parlar tre la debuta e d’aver pas paur de far d’errors. Per eles, l’aprendissatge d’una lenga ven un jòc, un desfís a relevar amassa, totjorn dins un esperit de collaboracion e de curiositat.