Lo 24 de novembre passat, las eleccions municipalas parcialas anticipadas de Ronhac (País Marselhés) abotiguèron a una victòria istorica per Christophe Gonzalez, candidat del Recampament Nacionala (RN), qu’obtenguèt lo 38,24 % dels sufragis, çò rapòrta La Provence. Aquel resultat marca una virada màger per una vila qu’elegís lo primièr cònsol màger de l'RN dempuèi trenta ans dins lo departament. Aquela victòria es arribada après una campanha tibada e un feble taus de participacion.

Lo despolhament dels resultats debutèt dins la serada, amb los primièrs indicis qu'indicavan una fòrta tendéncia al benefici de Gonzalez. Dins lo primièr burèu de vòte, aviá ja pres un avantatge sus sos adversaris, amb 142 voses comptabilizadas contra 154 per Willy Nicollet (divèrs drecha), e un escart de mai de 60 voses amb la consolessa màger sortenta, la centrista Sylvie Miceli-Houdais, qu’aviá pas recoltat que 78 voses. Fin finala, la tendéncia se confirmèt a mesura que s'anonciava los resultats, e Christophe Gonzalez prenguèt un ascendent irreversible, amb mai o mens una centena de voses d’avança sus sos concurrents. Fin finala Gonzalez ganhèt las eleccions amb 2036 voses, contra las 1845 de Nicollet e las magras 737 de Miceli-Houdais. La consolessa màger, acusada d'una utilizacion abusiva de la carta bancària de la municipalitat per de despensas personalas, aviá perdut la majoritat après la demission de mantun cònsol.

La victòria de Gonzalez se faguèt dins un contèxt de febla mobilizacion. Lo taus de participacion foguèt del 52,07 %, leugièrament superior al del primièr torn (51,20 %) mas plan luènh de las espèras per una eleccion municipala. Aquela flaca afluéncia joguèt en favor de l’estrategia de cèrts candidats, mas sufiguèt pas a reversar la dinamica al benefici de l'RN.

Pendent la proclamacion dels resultats, Christophe Gonzalez exprimiguèt son emocion e sa reconeissença als electors, en afirmant que trabalhariá amb totes pel ben de Ronhac. Soslinhèt qu’aquela victòria èra pas solament la de l'RN, mas la de la vila e de sos abitants, qu’avián causit “lo cambiament e l’estabilitat”. De son costat, Franck Allisio, responsable del partit ultradrechista dins lo departament, qualifiquèt aquela victòria d’”istorica”, en remembrant que fasiá trenta ans que l'RN aviá pas emportat cap de victòria municipala dins las Bocas de Ròse.

Sylvie Miceli-Houdais, la consolessa màger sortenta, reconeguèt sa desfacha amb dignitat e assegurèt que perseguiriá son trabalh fins a l'acabada de son mandat. Son abséncia de sosten dins la campanha foguèt un factor determinant, sustot davant la montada en poténcia del partit d'extrèma drecha e de sos aliats politics.