La Cort administrativa d’apelacion a interdich l’usatge de la lenga còrsa pendent los debats de l’Assemblada de Corsega, en confirmant una decision anteriora del tribunal administratiu de Bastia. Aquel tribunal aviá jutjat en març de 2023 las disposicions del reglament interior de l’Assemblada incompatiblas amb la lei, al motiu que permetián als elegits de s’exprimir en una lenga autra que lo francés.

La Cort administrativa a estimat que las disposicions del reglament interior “an per objècte e per efièch de conferir lo drech als membres de l’Assemblada de Corsega de s’exprimir, en session d’aquela amassada, dins una lenga autra que la lenga francesa”, çò qu’anariá contra la Constitucion.

La Collectivitat de Corsega, qu’aviá ja depausat un recors contra lo jutjament del tribunal administratiu de Bastia, considèra d’ara enlà de ne depausar un autre davant lo Conselh d’Estat. Dins un comunicat, denóncia una decision contrària als tèxtes europèus e internacionals que garentisson los dreches lingüistics, e projècta tanben de menar aquela question davant las instàncias judiciàrias europèas e internacionalas.

Sul plan politic, aquela defensa afortís las revendicacions d’una reconeissença oficiala de la lenga còrsa. La Collectivitat plaideja per una revision constitucionala que balhariá al còrs un estatut d’oficialitat, en estimant qu’aquela batalha es cruciala per preservar l’identitat culturala de l’illa. Lo messatge es clar: “Nimu ùn ci hà da impedisce di parlà a nostra lingua. Lingua corsa, lingua ufficiale!” (Degun nos a d’empachar de parlar nòstra lenga. Lenga còrsa, lenga oficiala!)

Pour la Cour administrative d’appel de Marseille, le droit de s’exprimer en langue corse au sein de l’Assemblée de Corse est contraire à la Constitution. Notre réponse : il faut changer la Constitution !
Lingua corsa, Lingua ufficiale ! pic.twitter.com/Etf31N5p5l

— Gilles Simeoni (@Gilles_Simeoni) November 25, 2024