Lo conselh de seguretat de las Nacions Unidas se reüniguèt dimècres d’urgéncia après que de membres de l’oposicion siriana acusèsson lo govèrn de Bashshar Al Asad d’aver atacat amb de gas nerviós qualques endreches prèps de Damasc, la capitala del país. Segon l’Observatòri Sirian dels Dreches Umans, l’atac faguèt cent mòrts, del temps que l’oposicion elevava la chifra fins al milièr. Lo govèrn de Damasc a negat l’emplec d’armas quimicas e ditz que las acusacions an pas cap de fondament.
 
Los membres del conselh de seguretat foguèron incapables d’arribar a un acòrdi per demandar formalament que se faguèsse una recèrca de l’atac, en una nòva mòstra de la division d’aquel organ de l’ÒNU sul conflicte sirian. Russia e China volguèron pas segondar una accion contra lo govèrn sirian, qu’es çò que volián probable los autres representants internacionals.
 
Justament i a sul terren una mission d’expèrts de l’ÒNU per examinar se s’es emplegat d’armament quimic.
 
Se se confirma l’atac, que se seriá debanat dins los quartièrs de l’èst —Zamalka, Arbin e Ayn Tarma—, seriá lo pièger dempuèi que comencèt la guèrra fa dos ans.
 
Ièr aqueles quartièrs de la banlèga de Damasc, e lo quartier d’Al Qabun, foguèron bombardats amb d’avions per l’armada del govèrn sirian, segon qualques mèdias.
 
Las autoritats sirianas e los rebèls s’acusan mutualament d’emplegar d’armas quimicas dins una guèrra civila, plena d’interèsses internacionals, qu’en dos ans a fach aperaquí 100 000 mòrts.