Dijòus 28 de novembre de ser, lo govèrn chadian anoncièt que metriá fin a sos acòrdis militars amb França, marcant un cambiament istoric dins las relacions entre los dos païses. Aquela decision subreven après una sèria de reviradas pels interèsses franceses en Africa, que semblan de mostrar un declin de son influéncia sul continent. L’anóncia foguèt facha pel ministre dels afars estrangièrs de Chad, Abderaman Koulamallah, e aviá per mira d’afortir la sobeiranetat del país, en reorientant sas associacions estrategicas segon sas pròprias prioritats nacionalas.

Aquela rompedura subreven qualques oras après la vesita del ministre dels afars estrangièrs francés, Jean-Noël Barrot, que pareis d’èsser pas estat assabentat de la decision. Aquela revirada es particularament dolorosa per França, que compta sus Chad per manténer sa preséncia militara dins la region del Sahèl, un ponch estrategic crucial per sos interèsses economics e geopolitics, après èsser estat embandida de païses coma Burkina Faso o Mali.

De son caire, tanben lo president senegalés Bassirou Diomaye Faye a assolidat que i auriá lèu  pas pus de soldats franceses en Senegal. Faye, elegit recentament, desira de reequilibrar las relacions amb França, en afirmant aital la sobeiranetat e l’independéncia de Senegal. Coma Chad.

Istoricament, França a tostemps sostengut lo regim chadian, en particular jol dictator Idriss Déby, qu’aviá entretengut de relacions estrechas amb París. Après sa mòrt en 2021, son filh Mahamat Déby a pres lo cap del país, mas sa gestion es estada marcada per de contèstas reprimidas violentament. La fin de l’acòrdi de defensa poiriá èsser percebuda coma un signe que Chad cèrca de diversificar sas associacions, sustot amb Russia o sas societats militaras privadas, en cercant de preservar son independéncia.