Lo grop de rap en lenga irlandesa Kneecap a ganhat son cas de discriminacion contra lo govèrn del Reialme Unit après que l’anciana secretària dels afars economics, Kemi Badenoch, lor refusèt un finançament.

Lo trio de rapaires nòrd-irlandés, que foguèt criticat pels ancians membres del govèrn conservator pels mots d’unas de sas cançons, lancèt una accion legala en revendicant que la decision dels reténer una subvencion los discriminava per de motius d’opinion nacionalista e politica. Après una brèva audiéncia a la Cort Suprèma de Belfast divendres passat, foguèt convengut que lo govèrn pagariá a la còla 14 250 liuras, la meteissa quantitat qu’aurián percebut amb la subvencion.

La demanda del grop al Music Export Growth Scheme, que sosten d’artistas inscriches al Reialme Unit dins los mercats globals, foguèt d’en primièr acceptada per l’Indústria Fonografica Britanica. Mas foguèt quitament refusada per Badenoch, ara cap conservatritz de l’oposicion, quand èra secretària dels afars economics del govèrn britanic; las subvencions son supervisadas pel Departament de l’Economia e del Comèrci e pel Departament de la Cultura, dels Mèdias e de l’Espòrt.

“An ensajat de nos far calar”

DJ Provai, membre de la banda, arribèt a la Cort dins una Land Rover anciana qu’imitava un veïcul de polícia portant las bandièras irlandesa e palestinian, en i sonant de musica fòrta.

Cargava son abitual passamontanha tricolor irlandés, que tirèt puèi per intrar dins l’edifici del tribunal.

Après l’audiéncia, DJ Provai, dont lo nom vertadièr es J.J. O’Dochartaigh, diguèt que la motivacion del grop èra "l’egalitat". "Per nosautres, aquela accion èra pas per las 14 250 liuras; aurián pogut èsser 50 penics," çò diguèt. "Èra una ataca contra la cultura artistica, una ataca contra l’Acòrdi del Divendres Sant en se e una ataca contra Kneecap e nòstre biais de nos exprimir", çò apondèt. En consequéncia, "l’anciana secretària d’estat Kemi Badenoch e son departament agiguèron illegalament; aquò es ara un fach. An ensajat de nos far calar e i an capitat".

Dins un comunicat, lo Departament de l’Economia e del Comèrci a afirmat que la prioritat del govèrn es d’"ensajar de reduire los còstes e d’ajudar a protegir lo contribuidor de mai de despensas", en apondent que lo govèrn contestariá pas lo desfís trach per Kneecap perque crei pas qu’es dins l’interès public.

Qui son los Kneecap?

Format en 2017 dins l’oèst de Belfast, Kneecap es compausat de tres amics qu’interprètan jols noms de scèna Mo Chara, Moglai Bap e DJ Provai.

Lo grop s’es tostemps exprimit en favor de l’unitat irlandesa, e una aficha particularament provocaira per lor virada "Adieu a l’Union" de 2019 emmalicièt lo Partit Conservator.

Lor cançon Brits Out (declarèron a Sky News qu’èra una lengada sus las amigdalas del govèrn) faguèt tanben polemica, del temps que lors referéncias al consum de drògas los menèron a èsser fòrabandits de la television publica irlandesa RTE.

Mas lo grop gaudís d’un succès enòrme tant sus scèna coma a l’ecran. A la debuta d’ongan, sortiguèron un filme biopic, tanben sonat Kneecap, amb l’actor irlandés-alemand e nomenat dos còps als Oscars Michael Fassbender. Lo film foguèt comparat a Trainspotting, 8 Mile e 24 Hour Party People pels critics e, en genièr, ganhèt lo prèmi del public al Sundance Film Festival, una veirina internacionalament reconeguda pel cinèma independent. Lo film es estat tanben nomenat coma lo representant d’Irlanda per la lista de melhors longmetratges internacionals als Oscars de 2025.

They don’t like that we oppose British rule, that we don’t believe that England serves anyone in Ireland and the working classes on both sides of the community deserve better; deserve funding, deserve appropriate mental health services, deserve to celebrate music and art and… pic.twitter.com/8L9SnU5aTC

— KNEECAP (@KNEECAPCEOL) November 29, 2024

Best news report of the day here - credit where it’s due to RTE 😂👏🇵🇸

And even some credit to the Judge today who fairly said:

“I am sure there is not a lot Kneecap can agree with His Majesty’s Government on”

And finished with “go raibh mhaith agaibh” 🔥 pic.twitter.com/nPa8t3skTe

— KNEECAP (@KNEECAPCEOL) November 29, 2024