Lo 22 de novembre passat, se tenguèt a Bastia , en Corsega, a 14a edicion del Liet Internacional, lo festenal europèu de la cançon per las lengas autoctònas minorizadas, çò rapòrta France 3. Aquel eveniment, de còps comparat a l’Eurovision, ofrís una scèna als artistas que cantan en de lengas sovent pauc ausidas a l’escala internacionala. Ongan, i an participat dètz artistas venguts de tota Euròpa, amb de cançons en breton, catalan, basco, sarde o nòstre occitan.

La representanta occitana, la tolosana Séverine Bonnin, i a obtengut la tresena plaça amb sa cançon Catarsis. Dins una entrevista a l’edicion occitana de France 3, exprimiguèt sa fiertat de representar las lenga e la cultura occitanas, amb una cançon “que descriu nòstra istòria, una cançon especiala, a l’encòp rock e amb de sons medievals, tradicionals”. Après aver obtengut la 3a plaça, mostrèt sa satisfaccion: “Es vertadièrament una victòria perque per ieu, es una faiçon de defendre la lenga occitana e la cultura, la cultura d’Occitània”, çò diguèt.

La primièra e segonda plaça son per las representantas en lenga ladina e frisona respectivament, amb las cançons Una segunda piel e Foarby.

Aquel festenal a per mira de promòure la diversitat lingüistica en Euròpa e sosténer las lengas minorizadas. Lo Liet Internacional es una escasença polida de descobrir de talents de tota Euròpa e de celebrar de culturas sovent oblidadas. Lo Liet Internacional s’organizèt pel primièr còp en Corsega en 2002, e dempuèi vegèt d’edicions en Suècia, Itàlia, Alemanha o Espanha. Aquel concors es d’ara enlà reconegut pel Conselh d’Euròpa e se vòl un protagonista de la preservacion de las lengas autoctònas mal reconegudas.