Lo rescontre internacional França-Irlanda a Nantas a vist la primièra seleccion de Lisa Lartigue (17 ans) dins l’esquipa nacionala amb los òmes: “A Tolon, a la debuta, acompanhavi los jogaires per portar l’aiga, puèi, m’an demandat de prene part als entrainaments e aquò m’a agradat.”. Lo 13-cadieral es vertadièrament un espòrt inclusiu.

Elèit-1: Festenals ofensius

Al Molin, dissabte, Lesinhan se trapa menat 12-0 per Sent-Gaudenç, torna a egalitat just abans la pausa e s’envòla dins lo segond temps per ganhar 35-18.

A l’Agulha, Limós e Albi prepausan al public una partida tristoneta amb un jòc estequit. Los vesitaires tarneses acaban per s’impausar: 10-8.

Dimenge, cavalièr sol a Domèc per Carcassona XIII que bat lo Tolosa Olimpic 56-14. Un derbí catalan plan disputat a Pià que vira a l’avantatge dels Dragonets 24-22 alara que Vilafranca demòra mèstre a l’ostal fàcia a Vilanòva d’Òlt: los Lops menan 24-4 a la pausa e gardan l’avantatge final: 30-22.

La dimenjada que ven es de pausa abans la jornada dels 14 e 15 de decembre qu’aurà per cap d’aficha lo revenge del campionat passat: Carcassona-Albi (dissabte 14 a Domèc).

Elèit-2: Lo cap de fila Carpentràs batut a Vilagalhenc

En Elèit-2, Carpentràs garda la primièra plaça malgrat sa desfaita a Vilagalhenc: 4-28. Victòrias a domicili tanben per Realmont fàcia a Pàmias: 30-22, de Palau fàcia a Tonens: 48-24 e de Salon fàcia a L’Escura: 42-26.

Lo TO pren coneissença del calendièr 2025 del Championship

Lo Tolosa Olimpic entamenarà sa sason 2025 de Championship lo dissabte 15 de febrièr amb la recepcion dels Viquings de Widnes, abans d’anar a York lo dimenge 23 de febrièr e de reçaupre Bradfòrd lo 8 de març.

Tolosa ensajarà de jogar tornarmai los primièrs ròtles de la competicion amb Bradfòrd, Londres e Yòrk. Dins la sason, descobriràn los dos clubs que montan de Liga-Un: Hunslet e Oldham.