Lo 16 de novembre passat, lo Centre Regional dels Ensenhaires d’Occitan de l’acadèmia de Tolosa (CRÈO Tolosa) faguèt son amassada generala amb un vintenat de presents. Fàcia a la manca d’activitats prepausadas pel rectorat e los autes actors occitans, lo CRÈO reagís.

Lo 6 e 7 de mai de 2024, se faguèt lo recampament de 634 escolans de tota l’acadèmia de Tolosa. Un eveniment positiu, un succès, amb 18 collègis o licèus concernits, 17 intervenents, que permetèron a aqueles joves de veire que son pas solets a s’interessar a l’occitan. Descobriguèron tanben una vida artistica rica en lenga nòstra.

Amb lo desmargament del CAPÒC, los ensenhaires d’òc se trobèron fàcia a de dificultats per trapar las ressorsas pedagogicas. Lo CRÈO Tolosa interpelèt la Region (finançaira del CAPÒC). Sens responsa per ara. Un ensenhaire, Bertrand Pemolièr, es encargat de la « prefiguracion » del « futur CAPÒC ». Lo CRÈO Tolosa veirà çò que se farà.

L’associacion mondina dels ensenhaires trabalha de longa amb los elegits e encargats de mission regionals, amb l’ÒPLO, qu’es a se reorganizar jos la direccion de Gauthier Lagalaye, e Òc-Bi, per las questions d’ensenhament. Atal participèron, convidat per l’ÒPLO, al bilanç de la convencion Estat-Region.

Trabalhèron tanben al restabliment d’un temps d’antena mai significatiu per l’occitan a France Bleu Occitanie e al collòqui de la FLAREP (Federacion per las lengas regionalas dins l’ensenhament public) en Flandra.

Al moment present, cal notar un cèrt nombre d’incertituds e novetats.

D’incertituds amb lo darrièr Conselh Academic de l’Ensenhament de l’Occitan (CAEÒC) que foguèt remandat sens explicacions e al darrièr moment per se tenir fin finala pendent las vacanças d’estiu e sense lo rector.

De novetats amb un Inspector Pedagogic Regional (IPR) d’occitan novèl a Tolosa, Thierry Doussine, qu’es l’ancian inspector de la circonscripcion de Valença d’Agenés. L’ancian IPR, Daidièr Agar, li daissarà una situacion complicada dempuèi la reforma Blanquer de 2019. De contactes son estats preses amb T. Doussine per preparar lo darrièr CAEÒC de l’annada.

Per relançar lo CRÈO Tolosa, l’idèa d’èsser mai present suls rets socials e sus Jornalet foguèt adoptada, perque un CRÈO que comunica pas es un CRÈO qu’existís pas. Aquò demanda de regularitat dins las publicacions que devon èsser positivas en mostrant l’accion dels ensenhaires d’òc. En mai d’aquò, lo CRÈO Tolosa sosten la correguda per l’occitan, La Passem, en Tarn los 23 e 24 de mai de 2025.

Se parlèt, enfin, de l’idèa de far una granda manifestacion occitanista en 2025 a Marselha o endacòm mai, benlèu Tolosa. Lo CRÈO Tolosa i es en favor, quitament se lo relambi es cortet. Cal arrestar las lutas d’ègo entre occitanistas perque l’ora es grèva.

Vidèo dels rescontres academics occitans:

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jornalet.com