L’occitan, una de las lengas minorizadas reconegudas per l’estat italian, ven d’èsser reconegut sus un sagèl commemoratiu emés per las Pòstas Italianas. Aquel timbre celèbra las dotze minoritats lingüisticas protegidas per l’article 6 de la Constitucion italiana, valent a dire, dins l’òrdre alfabetic, l’albanesa, l’alemanda, l’arpitana (francoprovençala), la catalana, la croata, l’eslovèna, la francesa, la friolana, la grèga, la ladina, l’occitana e la sarda.

Lo sagèl, dessenhat per Matias Hermo, mòstra Itàlia environadda d’un riban tricolor e dels noms de las minoritats lingüisticas, e se n’es estampat 250 000 exemplars.

DinsLa Stampa,  Davi Arneodo, del Centre Provençal de Combascura, destaca l’importància d’aquela reconeissença, malgrat qu’arribe 25 ans après la Lei 482 de 1999 sus las lengas istoricas. Arneodo planh qu’aquela lei comprenga solament 12 lengas, creant una distincion injusta entre lengas de “primièra” e “segonda” categoria. A mai, Arneodo remembra las paraulas de Mistral “qual ten la lenga ten la clau” per soslinhar l’importància de la lenga per l’identitat e lo futur d’un pòble.

De son caire, Rosella Pellerino, directritz scientifica de l’Espaci Occitan, saluda l’iniciativa e soslinha qu’aquelas minoritats enriquisson lo territòri, en preservant non solament la lenga mas tanben las tradicions e en contribuissent a desvolopar lo torisme cultural.