En l’espaci d’una setmana, los rebèls sirians, menats pel grop islamista Hayat Tahrir Ash Sham, an infligit un còp màger al regim de Bashshar Al Asad. Après aver pres Alèp lo 1r de decembre, an capitat a intrar dins la vila estrategica d’Hama, situada a un centenat de quilomètres al sud d’Alep, après de violents combats amb l’armada siriana. Las paucas ajudas de l’aviacion russa contra l’avançada dels rebèls d’aquestes jorns n’an pas servit a res. D’ara enlà, los islamistas contraròtlan doas de las grandas vilas sirianas, e son a mand d’avançar cap al sud, devèrs Homs e la capitala, Damasc.

Hama, a 210 km al nòrd de Damasc, es una vila clau pel governament sirian. Constituís una plaça essenciala menant a la capitala e a Homs, la darrièra granda vila jos contraròtle governamental. Los combats de carrièra se son perseguits dins mantun quartièr, e las fòrças del regim son estadas forçadas de se replegar, reconeissent lor desfacha. Segon l’Observatòri Sirian dels Dreches Umans, d’ajudas militaras son estadas enviadas a Hama, mas los rebèls son arribats d’encerclar la vila e de la prene. Dempuèi lo començament de la guèrra civila siriana en 2011, Hama èra totjorn demorada entre las mans governamentalas.

Segon Sud-Ouest, la guèrra en Siria s’es reviscolada a causa de mantun factor geostrategic e militar. L’ofensiva menada pels islamistas e los rebèls del nòrd contra lo regim de Bashshar Al Asad, qu’a permesa la presa rapida d’Alèp d’en primièr e d’Hama cinc jorns apuèi, s’inscriu dins un contèxt de fragilitat acrescuda del regim sirian. Après mantun mes de preparacion, l’ataca comencèt lo meteis jorn qu’intrava en vigor una trèva entre l’Hezbollah, aliat d’Al Asad, e l’armada d’Israèl, pendent que Russia contunhava sa guerra contra Ucraïna. La baissa de l’engatjament rus e la guèrra dobèrta de l’Hizbullah contra Israèl an aflaquits los sostens tradicionals de Damasc.

Los rebèls an lèu conquistats de territòris estrategics, dont l’autoestada M5 que religa Damasc a Alèp, revelant la feblesa del regim sirian, d’ara enlà isolat e sens sosten significatiu de sos aliats. Aquela ofensiva subreven tanben al moment que de tensions diplomaticas se manifèstan entre Siria e Turquia, e ont lo raprochament amb Ankara sembla blocat.