La Generalitat de Catalonha autrejarà lo 8n prèmi Robèrt Lafont al cineasta alpenc Fredo Valla. Aquel guierdon s’autreja a las personas o entitats remarcadas per las defensa, projeccion e promocion de l’occitan, lenga oficiala dins tot lo Principat de Catalonha dempuèi 2006 per que sián garentits los dreches dels ciutadans d’Aran.

Après qualques proposicions recebudas, la jurada a decidit de li decernir lo guierdon, que se remetrà dins una ceremònia al palais de la Generalitat dijòus que ven, 12 de decembre.

Nascut a la Val Varacha, dins las Valadas Occitanas de Piemont, en 1948, Fredo Valla es scenarista, realizaire, escrivan, professor e activista cultural. A escrich e dirigit un bèl nombre de filmes e dins fòrça d’eles i difond la lenga, la cultura e l’istòria occitanas. Es un defensor actiu de las minoritats lingüisticas dins l’estat italian. Aquestes darrièrs ans, es fòrça conegut per aver realizat Bogre, un brave documentari sus la persecucion dels catars, òbra per la quala lo benastruguèt lo papa Francés, que li demandèt de la projectar al Vatican. Valla a consagrat tota sa vida a far conéisser la lenga, la cultura e l’istòria occitanas dins lo cinèma. Foguèt guierdonat de nombroses prèmis e prepausat a plan d’autres.

Lo prèmi Robèrt Lafont de la Generalitat foguèt instituit en 2010 per la Direccion Generala de la Politica Lingüistica. Los laureats de las edicions anterioras son Pèire Bèc (2010), Felip Gardy (2012), Jacme Taupiac (2014), la Fondacion Musèu Etnonologic dera Val d’Aran (2016), Georg Kremnitz (2018), Frederic Vergés (2020) e Xavier Lamuela e Lissa Escala ex æquo (2022).