Ongan qu’an sonat los 90 ans de l’associacion de las arts e tradicions popularas Lo Cèu de Pau. Ad aquera escadença, lo 12 de deceme qui vien, que’s presentarà ua mustra consacrada a la descobèrta de l’istòria deus 90 ans deu grop, deus sons instruments e deus sons vestits a la mediatèca intercomunau André Labarrèra de Pau. La mustra, qu’obrirà dinc au 12 de genèr de 2025, qu’ei ua coproduccion de l’associacion Lo Cèu de Pau e deu CIRDÒC - Institut occitan de cultura, dens l’encastre de las soas missions d’acompanhament deus actors de la cultura occitana.

Un vernissatge que serà organizat lo dissabte 14 de deceme a 12h dab danças, musica e aperitiu, en marcant lo començament de divèrs rendètz-vos de non mancar pas:

• Dijaus 19 de deceme a 15h30: visita guidada de l’exposicion en francés (sus inscripcion).

• Dijaus 19 de deceme a 18h30: Cafè Ètno “Las associacions de las arts e tradicions popularas au sègle XXI” au cafè Aqueras Montanhas de la Ciutat (plaça F. Récaborde de Pau). Que i aurà discussion dab actors vienguts de diferents grops entà escambiar a l’entorn de las lors activitats.

• Dimèrcs 8 de genèr a 15h30: visita guidada de l’exposicion en occitan (sus inscripcion).

• Que i aurà tanben ua repeticion obèrta au public, mes la data es enqüèra a determinar.

Vaduda en 1934, Lo Cèu de Pau qu’ei ua associacion qu’a lo prètzhèit de conservar vivas las tradicions culturaus bearnesas. Ambaishadora de la vila de Pau e de Bearn, desempuish quasi un sègle que cor la planeta de Japon a Peró, e qu’a arcuelhut dens lo capdulh bearnés las mei hautas personalitats deu moment, taus com lo president de l’Union Sovietica, Nikita Khrushchov, quan visitè Pau en 1960.

Àudio sintetizat per votz.eu