Lo divendres 29 de novembre, passèrem la jornada sul terren d’Audrey a Cornanèl. Installèrem lo campament dins una cabana qu’es un abric per las ratapenadas. Caminèrem long del riu e vegèrem l’aiga sortir de las plantas e remontar cap a las nívols, èra magic!

Descobriguèrem tanben de peadas de bèstias pel sòl, segurament un singlar o un cabiròl. Aprèp un bon chocolat caud, amassèrem los tresaurs de la natura e ne faguèrem de land art. Observèrem puèi las aranhas, de nises, de nisadors, de campairòls e sustot constatèrem que i aviá pas pus de flors. Per manjar, aviam aprestat de pescajons al cambajon e formatge, pel dessèrt las degustèrem al chocolat. Emma nos legiguèt puèi una istòria pel temps calme. Foguèrem plan contents de veire Audrey nos jónher qu’a mai nos acompanhèt al riu. I posquèrem observar de demoisèlas en fèrre, mas i trapèrem pas de peisses. Escotèrem lo bruch de l’aiga e amassèrem de tèrra seca qu’aviam fait amolir dins l’aiga. Amb aquela tèrra, pintrèrem las parets de la cabana coma los òmes preïstorics.

Encara una polida jornada en atura amb la classa.

Elena, Armony, Pema, Maelya, Emma e Joachim
Mélodie Bellanger, regenta
Calandreta Limosenca Joan Clercy

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jornalet.com